Mizoram Badminton Association (MBA) leh Zonet Cable TV Pvt. Ltd. tangkawp chuan Hrangbana Memorial Mizoram Badminton League hmasaber chu kumin kumtawp, November thla tir atanga December thla tir thleng hian Aizawl ah a buatsaih dawn.
Veng/khua behchhan Team panga (5) inelna tur MBL atana inremna hi vawiin khan Zonet Managing Director Pu R.K. Lianzuala leh MBA President Pu C. Zorammuana ten an ziak a ni. MBL hi zan 13 khelh tura ruahman a ni a, Team tinah player 11 awmin, Men’s Singles, Men’s Doubles, Mixed Doubles, Senior Doubles, Under 19 Boys Singles ahte inelna a awm dawn a. Inkhelte hi Zonet Cable TV in Live in a pe chhuak thin dawn a ni.
MBA President Pu C. Zorammuana chuan Mizoram a badminton league hmasaber MBL sponsor tura Pu Hrangbana fate an rawn pen chhuak leh Zonet Cable TV in Badminton tihlarnan leh hmasawnna atana remchanna an lo siam chu lawmawm a tih thu a sawi. Ruahman dan chuan MBL hi Team 5 inelna tur a ni a, Aizawl khawpui chhunga veng 4 leh District pakhat tan hmun (franchise) dah a ni.
Team Auction hi September thla chhunga tihfel tur a ni a, player lilam hi tih thuai tur a ni bawk. State pawn player te pawh MBL ah hian an rawn khel thei dawn a, hemi atan hian Team thenkhat chuan hma an la tan tawh nia hriat a ni