Khawvela boxer awm tawh zawng zawnga hlawhtling bera chhal ngam Floyd ‘Money’ Mayweather chuan Manny Pacquiao nena rematch chungchang ngaihtuaha sawi ho turin Saudi Arabia a pan dawn tih social media lama a video tawi dahchhuahah a sawilang.

Kum li kalta khan boxer ropui pahnih Mayweather leh Pacquiao-te hi an lo inhnek tawh a, ngaihven a hlawh ang aiin beisei a pha lo viau a, Mayweather hi awlsam thawkhat takin a chak.

Boxing khawvelin rematch a hmu leh chaka, mahse Mayweather hi a chawlh zui tak deuh mai avangin rematch a awm tawh lo tura ngaih a ni hman. Mahse Mayweather hi Conor Mcgregor hnek tura a rawn kir leh avangin Pacquiao a hming lam rik a ni nasa chho hle a, mipui hmuh duh an chhawp chhuak ngei dawn niin a lang mek.

Mayweather chuan a video tawi post-ah hian Saudi Arabia-ah Pacquiao nena rematch chungchang buaipui tura a kal tur thu sawiin, “A hmasa berin lawmthu ka sawi duh a, Saudi Arabia-ah Mayweather-Pacquiao rematch sawi ho tura ka lo kal thei tur hi ka lawm hle. Saudi Arabia lo inring rawh, Floyd ‘Money’ Mayweather ka rawn kal dawn e,” tiin a sawi.

Boxer pahnihte hi an naupang tawh lo hle a, a naupang zawk Pacquiao pawh kum 40 ni tawhin, Mayweather hi kum 42 a ni ve tawh thunga, an inhnek leh a nih chuan an vanglai ang chuan hmuhnawm tawh dawn lo mahse ngaihven a hlawhin, sum che vel pawh a bawn leh hle ngei dawn a ni.