Floyd Mayweather leh Manny Pacquiao te chu inhnek leh thei turin hma an la dawn tan niin Showtime chuan an sawi a, an inhnek leh a nih chuan pawisa tam tham tak a awm thei tura ngaih a ni.
Mayweather leh Pacquiao te hi 2015 khan an inhnek tawh a, an inhnek tum khan pay-per-view leh ticket hralhna atangin £470 million vel zet chu an la lut a. Las Vegas khawpuia ‘Fight of the Century’ ah khan Floyd Mayweather chu unanimous decision hmangin a chak a, hemi zawh hian 50-0 record neiin boxing a chawlhsan thu a puang zui a ni.
Showtime president Stephen Espinoza chuan tun hnaiah Floyd leh Manny te an inhnek leh theih dan tur an ngaihtuah chho tan niin a sawi a, Mayweather leh Pacquiao te pawhin an ngai thutak hle niin a sawi.
Stephen Espinoza chuan, “Floyd Mayweather chuan boxing ring chhunga a hmelma lian hmachhawn leh chu a duh ngei niin a lang a, a ngai thutak viau a. Thil awm dan ka hmuh leh chanchin hrang hrang ka hriat atang hian Manny Pacquiao pawhin hetiang hun thlentir leh ngei hi a duh tak zetin ka hria,” a ti.
“Floyd leh Manny te hi an inhnek leh dawn a nih pawhin thil chin fel hmasak tur tam tak a awm dawn a, kumin atan chuan a buaithlak deuh tawhin a rinawm a. A hma pawhin hun reilote chhungin Mayweather leh McGregor te inhnek tur pawh kan lo tifel tawh a, mahse tun tumah hi chuan tih rum rum kan duh ber dawn kher lo a ni,” a ti bawk.
Thla hmasa khan Floyd Mayweather chuan boxing ring luhchilh leh a tum thu a lo sawi tawh bawk a. “Kuminah ka rawn kir leh ang a, Manny Pacquiao hmachhawn leh ka duh a. Pawisa tam tham tak hlawh leh ngei ka duh a ni,” tiin a sawi.
Espinoza chuan American boxer chuan a thil sawi chu a taka chantir ngei a tum a rin thu a sawi a, Filipino boxer pawhin hetiang hun inher chhuak tur chu a nghahhlelh ve ngei a rin thu a sawi bawk a ni.
“Mayweather leh Pacquiao te inhnek hi kan hmuh leh ngei ka ring khawp mai a. Mi chuan heng boxer ropui pahnihte hi an inhnek leh an ring pha tawh lo a, mahse kei chuan ka la beisei tlat a ni,” a ti a.
“2019 ah inhnek thei ngei se duhthusam a ni a, engkim muang fan deuh leh rilru fim zawkin a buaipui theih ang a, hahdam zawkin Mayweather-Pacquiao 2 chu kan thlentir thei dawn a ni,” a ti bawk.