Manny Pacquiao chuan Floyd Mayweather nen inhnek leh theih chu a duhthusam a nih rualin exhibition match vela inham buai chu a duh loh thu a sawi.

Tun hnaiah Floyd Mayweather chuan Manny Pacquiao nen an inhnek leh dawn nia sawiin, Japan ram khawpui Tokyo ah exhibition match-ah an inhnek dawn niin a sawi a. Hemi chungchangah hian Pacman chu a tawng chhuak vat a, inhnek puitling a nih loh chuan inhnamhnawih a duh loh thu a sawi a ni.

May 2015-ah khan Las Vegas khawpuiah Manny Pacquiao leh Floyd Mayweather te hi an inhnek a, pawisa pawh a tam tham a, an inhnek hian ngaihven a hlawh hle a, ‘The Fight of the Century’ ti hiala sawi a ni a. An inhnekah hian American boxer chuan point hmangin Filipino boxer hi a hneh a ni.

Kum 40-a upa Pacquiao hian hneh lo nei lo, kum 42-a upa Mayweather chu hnek leh theih ngei a duh thu a sawi chhuak fo a. Kum hnih kaltaah khan Floyd chuan boxing a chawlhsan thu a puang tawh a, a inhnek hnuhnun berah UFC star Conor McGregor chu TKO in a hneh a ni.

Floyd Mayweather hian tun hnaiah Manny Pacquiao nen chuan Japan ramah an inhnek leh dawn niin a sawi chhuak a. He inhnek turah hian an result chu eng ang pawh ni se, exhibition match chauh a nih dawn avangin Mayweather-a record 50-0 ah chuan tihlan belh a nih loh tur thu a sawi.

Hetiang thawm a rik hnuah hian Pacman leh a team te chuan exhibition match mai mai chu engah mah an ngaih loh thu an sawi chhuak nghal a, Mayweather-a’n hemi chungchang a puangzar ve ringawt pawh thil tih chi loh tak, thu belh chian dawl lo tak a nih thu an sawi bawk.

Pacman chuan boxing ring chhunga Money Mayweather a hmachhawn leh dawn a nih pawhin exhibition match vel mai mai a nih dawn chuan inhnamhnawih ve loh a duh thu a sawi chhuak.

Pacquiao chuan, “Eng vangin nge exhibition match a nih kher ang? Inhnek pangngai nihtir law law rawh se,” tiin a sawi.

Mayweather hian 2017 kumah khan Conor McGregor a hneh hnuin inhnek a chawlhsan thu a puang zui a. Nikum December thlaah khan boxing ring chhungah chuan a lut leh a, Japanese kickboxer Tenshin Nasukawa nen an inhnek a, second 139 chauh an inhmachhawn hman a, Mayweather chu chakin £7.5 million bawr vel chu a hlawh a ni.