17 Nov 2018 03:52

inkhel

Mayweather leh Nasukawa an inbei dawn leh si

An puang fel a, an thulh leh a, tunah chuan Floyd Mayweather leh Japanese kickboxer Tenshin Nasukawa te chu December 31 hian an inhmachhawn tak tak dawn niin an sawi leh tawh.

November 5 khan boxing legend Floyd Mayweather leh kickboxer Tenshin Nasukawa te hi an inbei dawn tih an puang tawh a, mahse an puan atanga ni hnih hnuah Mayweather chuan engmah a hriatpui loh thu a sawi a. Promoter te chuan hma an la vat a, an inhriatthiamlohna te an chin fel hnuah Mayweather chuan ruahman lawk angin thil an kalpui tur thu a sawi ve leh a ni.

December 31 hian Tokyo khawpuia Saitama Super Arena ah kum 41-a upa Floyd Mayweather leh kum 20-a upa Tenshin Nasukawa te chu an inhmachhawn dawn ta a. He inbeihna hi fighter pahnihte record-ah dah luh a ni dawn lo a, an chak emaw, chak lo emaw, thil thleng lo ang chiah a ni dawn a, exhibition match chauh a nih tur thu an sawi.

Rizin Fighting Federation hotupa Nobuyuki Sakakibara chuan he exhibition match hi round 3 khelh tur a nih thu sawiin, a hmaa Mayweather-a’n eng emaw hriat fuh tawk loh a lo neih pawh an ching fel tawh tih a sawi a. Los Angeles khawpuiah Sakakibara hian Mayweather a bia a, Nasukawa nen an inbeih hunah hian inpet an phal dawn lo tih a sawi a ni.

Sakakibara chuan inpet phal dawn lo mahse sparring pangngai ang ngawt chu a nih dawn loh thu a sawi a, entute mit a tlai tham viau dawn niin a sawi. He inbeihna atang hian fighter te chuan sum tam tham tak an dawng dawn tih sawiin, a zat erawh chiang taka sawi a ni lo thung.

Mayweather leh Nasukawa te inbei en man pawh hi a hniam dawn lo hle a, seat man to ber chu 100,000 yen ($900) a ni ang a, a man tlawm ber chu 7,000 yen ($60) a ni ang.