06 Aug 2015 08:46

Inkhel

Mizo Sports Website hmasa ber

​Mayweather hmachhawn dawn loh vanga pawi ti Khan

American Boxer ropui Mayweather chuan a boxing zinkawnga a khingpui hnuhnung ber ni turin September ni 12, 2015 hian welterweight champion lo ni tawh Andre Berto a hmachhawn dawn.

Britain boxer tha Amir Khan chuan Mayweather a hmachhawn lo tur hi pawi a tih thu a sawi a, Amir Khan hian khawvela tha ber pakhat a nih laia vawi thum lai Mayweather a hmachhawn theih tak loh avangin hrehawm a ti hle.

Kum 28 Amir Khan hian June thla khan Chris Algieri a hneh hnuah pound-for-pound king Mayweather a hmachhawn ve thei tawh dawn emaw a inti a. Hetih lai hian Mayweather hi chuan a khingpui tur a duh duh a thlang ni berin a lang. Chuta a thlang ve ta lo chu Amir Khan chuan pawi a ti hle.

"Welterweight division-ah hian chungnung ber nih tumin ka bei chho zel. Floyd Mayweather erawh hi chuan a inkhelh chhung zawngin khawvela boxer ropui ber ber a hnek a, a khingpui tur a duh duh thlang thei dinhmunah a ding.

"Andre Berto hi a tha hle a, a inhnek turah pawh duhsakna ka hlan a ni. A thawhrim zia ka hriatpui a, Floyd tan pawh hmachhawn harsa tak tur a ni e," tiin Amir Khan chuan a sawi.

Hneh loh nei lo Mayweather hian May thla khan Manny Pacquiao chu points-in a hneh a, hemi hnu hian a career-a a khingpui hnuhnung ber turin Andre Berto a thlang ta a, Andre Berto hian a match hnuhnung6-ah vawi thum lai hneh loh a tawng a ni.

picture credit : Getty