Mayweather hian min pumpelh lui ngar ngar: Amir Khan

06th October 2018, 06:10PM

Amir Khan chuan Floyd Mayweather chu kum tam tak pehhel lui niin a puh a, Khan hian Mayweather chu boxing ring chhunga thlem let leh a tum hle.

British boxer Amir Khan chuan tun hnaiah Matchroom leh Eddie Hearn te chu inremna a ziahpui a, wieght hnih champion lo ni tawh hian tun hnaiah Phil Lo Greco leh Samuel Vargas te a hneh a ni.

Kum hnih dawn a chawlh hnua a inhnek leh hmasak berah Phil Lo Greco nen Liverpool khawpuia Echo Arena-ah an inhnek a, hetah hian first round-ah Amir Khan chuan Lo Greco hi a knockout nghal a. Samuel Vargas nen an inhnek tumah erawh kum 31-a upa Khan hi point hmangin a chak ve thung a ni.

Khan hi British boxer tho Kell Brook nen inhnek thei tur anga sawi a ni mek a, hetih lai hian bout 50 chhunga la chak kim vek Floyd Mayweather chu Khan hian cho chhuah a tum mek a. Mayweather chuan a hmachhawn hreh avangin kum tam tak chu a pehhel lui tawh niin Khan hian tun hnaiah a sawi a ni.

Floyd Mayweather chuan boxing chawlhsan tawh mahse tun hnaiah rawn kir leh a tum hnai nia sawi a awm a. Mayweather hian Manny Pacquiao hmachhawn tura boxing ring luhchilh leh a rilruk nia an sawi bakah, Adrien Broner nen inhnek tura rawn inlan leh a tum niin an sawi bawk.

Nikum khan a vawi 50 inhnekna atan UFC star Conor McGregor chu Floyd Mayweather hian a hneh a, hemi hnu hian boxing a chawlhsan zui a ni.

Copyright © inkhel.com 2024. All rights reserved.