Manny Pacquiao chuan Floyd Mayweather chu boxing ring-a kir leh tura a thlem chhuah zawh loh thu sawiin, level sangah chuan tel ve tlak a nih tawh loh thu a sawi.

Filipino legend Manny Pacquiao leh Floyd Mayweather te chu 2015 ah khan £470 million zet awmnaah an inhnek a, he inhnekah hian unanimous decision in Floyd chu a chak a. Pacquiao chuan chak zawk tur ni ngeia a inhriat avangin result chu pawm harsa a ti hle a, inhnek that leh dan a ngaihtuah chho ta reng a, a duhthusam erawh a thleng thei ta lo.

Floyd Mayweather hian inhnek a chawlhsan tawh a, heti chung hian tun hnaiah Pacman nen hian inhnek leh thei an nih thu a ri leh thin a. Thu hi thang leh thin mahse Floyd chuan boxing ring a luhchilh leh a rinawm tawh vak lo hle.

Pacquiao chuan, “Money Man hian inhnek a chawlhsan tawh a, tuna ka la khelhna ang level sanga khel ve tlak a ni tawh lo a, chawl reng tawh zawk rawh se,” a ti.

“Boxing ring chhunga ka hmachhawn turte chu kei chuan boxing la chawlhsan lo, pangngai taka training nei chho thinte chauh ni se ka duh a, Floyd hi chu a awm mai mai tawh a, hnek tlak a ni tawhin ka ring lo,” a ti bawk.

Kum 40-a upa Pacman hian July 20 hian Keith Thurman a hmachhawn dawn a, anni pahnih hian WBA super welterweight title an inchuh dawn a ni.

Pacman chuan, “Tunah tak hi chuan Keith Thurman nen kan inhnek tur bak hi ka rilruah ka dah lian lo a, July 20 hi thleng vat vat se ka ti khawp mai a. Keith hian Las Vegas-a kan inhnek hunah boxing ring chhunga ka nihna dik tak a hmu dawn a, mak pawh a ti hle ang,” a ti.

Manny Pacquiao hian boxing chawlhsan a tum hnai ve tawh hle a, a chawlh hnuah pawh an chhungkaw hming chu boxing khawvela lan chhunzawm tir zel a duh a, a fapa chu a hniakhnung zui turin a chher chho mek a ni.

Jimmel Pacquiao chuan hun eng emaw chen chu Freddie Roach kaihhruaina hnuaiah training a nei tawh a, Pacman chuan a fapa tan hian hmathlir thui tak a nei chho tawh a ni.