27 Sep 2019 05:23

inkhel

Mayweather hi ka sawisa hrep thei ang: Mike Tyson

Mike Tyson chuan khawlaiah Floyd Mayweather nen insual ta se, awlsam taka a sawisak hrep theih tur thu a sawi.

Kum 53-a upa Mike Tyson chuan boxing ring chhungah inhmachhawn se, an pahnih chuan intiat vel ve ve se, a chak lo zawk a nih a rin thu a sawi zui a ni.

Tyson chuan kum 42-a upa American boxer chungchang sawiin, “Khawlaiah Floyd nen hian insual ta ila ka hah ve hman meuh pawhin ka ring lo a, rang takin ka hneh mai bakah, ka duh chuan ka sawisa hrep thei ang,” a ti.

“Intiat ta chiah ila, boxing ring chhungah inhmachhawn ta ila, kei aiin point a hmuh hnem ngei chu ka ring,” a ti bawk.

2005 kumah khan Mike Tyson chuan boxing a chawlhsan a, vawi 50 chakin vawi 6 chu a chak lo a, a record-ah hian no contest vawi 2 a awm bawk a ni.

Kumin kum tir lamah khan Mike Tyson hian a chhungrila sual awm tifai turin uchang tur chu a zu thin tih sawiin, hetia a tih hnuah hian a hmaa mi ang kha a nih tawh loh thu sawiin, a inthlak danglam vek niin a sawi.

Tun hnaiah khan 50-0 record nei, weight nga ngawta world champion ni thei Mayweather thil sawi, khawvela boxer ropui ber nia a inchhal chungchangah Tyson chu a ngaihdan a ni lo hle a, rilru kim chiah lo nia a ngaih hial thu a sawi chhuak.

“Floyd Mayweather hian khawvela boxer tha ber angin a lo inchhal ve ngawt a, Muhammad Ali hi a tluk pha lo mai pawh a ni lo, a hnaih hian a hnaih pha chhin lo hrim hrim,” tiin Tyson chuan a sawi.

“A insawi anga ropui tak tak hi ni ta se, amah ngeiin a fate sikul kal pawh a hruai ang. Ropui nihna hi mi laka inven atanga teh chi a ni lo, miin min pawm dan atanga teh chi zawk a ni a. Tunah te chuan a fate sikul kal pawh amahin a hruai ngam lo a, mi dawihzep tak, pa te tak te, dawihzep em em a ni ringawt,” a ti.