06 Dec 2018 05:10

inkhel

Mayweather hi boxing tichhetu a ni: Amir Khan

Amir Khan chuan Floyd Mayweather chu nuihzatthlak a tih thu sawiin, boxing boruak tichhetu a nih thu a sawi.

American boxer Floyd Mayweather hi December 31 hian Japanese kickboxer Tenshin Nasukawa nen an inhmachhawn dawn a, Floyd chuan exhibition match atanga pawisa a hmuh hnem berna tur a nih thu a sawi chhuak a ni.

Floyd Mayweather hian 50-0 record a nei mek a, hneh loh a la nei miah lo a. Hetiang kara kum 20-a upa kickboxer ber kher hmachhawn a remtih avang hian mak tih a hlawh hle a, a record chhiat a hlauh avangin boxer pangngai zawk a hmachhawn tha duh tawh lo niin an sawi phah hial a. Tlema pangngai ve deuh a hmachhawn chu Conor McGregor kha niin, Conor pawh boxer pangngai a ni lo zui a ni.

British boxer Amir Khan chuan kum eng emaw zat chu Mayweather hi a lo cho tawh a, mahse a cho hlawhtling thei tlat lo a, tunah phei chuan a beidawng tawh hle a. A cho chhuak thei dawn ngang lo nia a hriat tak avangin sawi chhiat lamah a ramtang ta a ni.

Amir Khan chuan, “Boxing leh MMA te hi han thlir chiang ula, eng vangin nge MMA leh UFC te hian boxing hi an khum tawh? Eng dang vang a ni lo a, UFC leh MMA ah te chuan fight tha tak tak en tur a awm a, mipuiin an hmuh duh chu an chhawp mai thin a. Boxing khawvelah ve chuan chutiang a ni lo a, Floyd Mayweather-a fight te phei hi chu fiamthu hi a ni ber tawh mai,” a ti.

“Floyd hian pawisa tam tak a dawng teuh teuh a, mahse hei hian boxing hi hma a sawntir lo chiang khawp mai a. Boxing fans te chuan beiseina sang tak nen anmahni sum sengin ticket an lei a, mahse an beisei ang he huin thil a thleng thin lo a. Nasukawa nen an inhmachhawn tur pawh thenkhat chuan a hmuhnawm an ring ngawt a, a teuh lo mai. A hmaa ding tur hi kickboxer a ni a, boxing-ah chuan ke hman an phal chuang lo a, a ho ngawt ang,” a ti bawk.