11 Oct 2019 05:17

inkhel

Mayweather-a’n Pacman hnek leh theihna a ngaihtuah

Floyd Mayweather chuan China rama exhibition match neih chu sirah hnawlin, hei ai hian Manny Pacquiao nen inhnek leh theihna tur lam a thlir niin an sawi.

Boxing legend Floyd Mayweather hian 2017 khan UFC star Conor McGregor chu boxing ring-ah a hneh a, sum tam tham tak dawngin hemi hnuah hian inhnek a chawlhsan thu a puang zui a. Kum hlui thlah niah khan Tokyo khawpuiah boxing ring a luhchilh leh a, Japanese kickboxer Tenshin Nasukawa nen exhibition match an nei a. Hetah hian Mayweather chu awlsam taka chakin £7 million a hlawh a ni.

England rama chanchinbu lar The Sun chuan tun hnaiah Floyd Mayweather chu China rama exhibition match nei leh thei tur a nih thu tarlangin, hei hi Mayweather chuan a hnar niin an tarlang a. Hneh loh nei lo boxer ropui hian a hmaa a lo hmachhawn tawh Manny Pacquiao chu hmachhawn leh theih dan a ngaihtuah niin an tarlang.

Hong Kong khawpuia inbun DEF Promotions director Jay Lau chuan, “Floyd Mayweather hi Hong Kong khawpuiah vawi hnih a rawn kal a, ka fapa Jayson nen an inbia a, keimah nen pawh kan indawr bawk a. China rama exhibition match neih chungchang kan sawipui a ni,” a ti.

“Japan rama Tenshin nen an inhnek ang deuh kha China rama tih ve kan duh thu kan sawipui a, event lian tham tak pawh a ni ngei dawn a. Kan indawr tluang viau dawn emaw kan tih laiin a rilru chhungril a rawn phawrh a, Manny Pacquiao chu a ngaihtuahnaah a dah lian ber a, Pacman chungchang a sawi chhuah hnuah chuan kan inbiakna pawh a tawp zui a ni,” a ti bawk.

2015 kumah khan Mayweather leh Pacquiao te chu an lo inhnek tawh a, hemi tumah hian Floyd chu point hmangin a chak a. Tun hnaiah thawm eng eng emaw a ri leh thin a, anni pahnih hi inhnek leh tur anga sawi a awm zeuh zeuh a. Pacman phei chuan inhnek leh theih ngei hi a duhna a rei tawh hle a ni.