31 Oct 2020 11:04

bakteaJr.

Mizo tlangval

​Mayweather-a’n no.1 pound-for-pound boxer nia a ngaih a sawi

Mi tam takin boxing luhchilh tawh zawng zawnga ropui bera an ngaih Floyd Mayweather chuan tunlai boxer zinga pound-for-pound tha bera a ngaih a sawi.

Mayweather hian a lo hneh tawh zinga mi Canelo Alarez chu a fak rualin, mi tam takin tunlai pound-for-pound boxer tha bera an ngaih Canelo hi Maywather-a no.1 a ni ve lo.

Tunlaiah weight hrang hrangah boxer tha tak tak an tam hlea, Tyson Fury leh Vasyl Lomachenko te pawh mi tam tak chuan pound-for-pound boxer no.1-ah ngai mahse, a career chhung zawnga hneh lo nei lo Maywather chuan Terence Crawford chu no.1 pound-for-pound boxer ni mekah a ngai.

Mayweather chuan pound-for-pound boxer tha bera a ngaih chungchang zawhna chhangin, “Tunah hi chuan Terence Crawford hi number one-ah ka dah.

“Canelo pawh light heavyweight champion a rawn nih khan min barakhaih a, khatiang em em khan a intih rit duh ka ring lova, mahse a inti rit tlat,” tiin ESPN a hrilh.

Mayweather-a’n number one-a a thlan Crawford hi vawi 36 inhnek tawhin, a tumpuite a la hneh fai veka, knock out hmangin vawi 27 a chak tawh.

Kum 33 mi Amarican boxer Crawford hi weight class pathuma world champion ni thei a ni a, kum 2014 leh kum 2015 inkar chhung khan WBO, Ring leh lineal lightweight title te a lo kawl tawh.

5 ft 8’-a sang Crawford hi light welterweight indisputed champion ni thei tharlam ber a ni a, kum 2015 leh kum 2017 inkar chhung khan WBA (super), WBC, IBF, WBO, Ring leh lineal light welterweight title te a kawl vek a, hemi hnu hian welterweight lamah a chho ta a ni.