02 Jun 2020 04:29

inkhel

Mayweather-a’n George Floyd vuina senso a tum dawn

Floyd Mayweather chuan tun hnaia police kut tuara thi George Floyd vuina senso chu tumsak vek a tum.

Kar hmasaah khan George Floyd chu Minneapolis police te chuan an man a, a mantu police te kut tuar hian a thi zui a. America ram chhungah he thihna duh loh lantirna hi a nasa hle a, tun thlengin an la buai viau a ni.

George Floyd mantu police Derek Chauvin chu tualthah thubuai siamsak a ni a. Derek Chauvin hian Floyd-a nghawng chu a thingthit hnan tlat a, a mi man hian a thawk that theih loh thu a sawi hnuah pawh a tho duh si lo a, a hnuah nikhaw hre loin a awm a, damdawi in lama an tlanpui hnu lawkah a thi zui ta a ni.

Vawi nga ngawt world champion lo ni tawh Floyd Mayweather chuan George Floyd vui a nih hunah chuan a vuina senso zawng zawng chu tum vek a inhuam thu a sawi a. Mi thenkhat chuan Floyd-a chhungte pawhin Mayweather-a inhuamna hi an pawm tawh niin an sawi.

Floyd hi June 9 ah khian a chenna Houston ah vui tur a nih thu an chhungkaw lawyer Ben Crump chuan a sawi a. Vuina senso zawng zawng hi boxer ropui Mayweather hian tumsak a duh thu a sawi chhuak a ni.

Mayweather Promotions CEO, Leonard Ellerbe chuan, “He thil ka sawi chhuah vang hian Floyd chu ka lakah a thinrim mai thei a, George Floyd vuina senso hi a vaia tum vek a inhuam a ni,” a ti.

“Tun tum hi hetiang lampang a tih hmasak ber a ni lo a, kum 20 kal ta atang khan mitthi vuina senso hi a lo tumsak ve fo tawh a. Amah Mayweather ber hian a thil tih hi mi hriata sawi chhuah a duh lo thin a, tun tumah erawh keimah hian ka sawi chhuak ta a ni,” a ti bawk.