Saitama Super Arena, Tokyo-ah Floyd Mayweather leh Japanese kickboxer Tenshin Nasukawa-te chu boxing bout-ah an inhnek a, round 1 pawh khel zo hman lovin Mayweather-a'n kickboxer rawlthar Tenshin Nasukawa-a chu knockout-in a hneh.

Mayweather-a hian kum 41 na a hmang mek a, kum 21 rawlthar Tenshin Nasukawa-a lakah erawh a kutthlak nat zia a lantir chiang hle , a taksa lenna a hmang tangkai a, an kutthlak pawh a inthlau hle tih a hriat theih. An intum chhung hian Mayweather-a hian ngaihnep hmel takin a nuih vel mai mai a ni ber. Round 3 tura ruahman ni mahse round 1 chhung pawhin Floyd-a'n a hnek tlu zing hle a, vawi thum a hnek thluk hnuah erawh Nasukawa-a corner chuan towel a rawn vawm lut a, Mayweather chakah puan a ni zui ta bawk.

Mayweather-a chuan boxing bout zawh hian, " Tokyo mipuite chungah lawmthu ka sawi duh a, he hmunah hian entertainment ropui entir ka duh avanga rawn kal ka ni. Hemi thlen theih chhan chu Pathian vang chauh a ni, '" a ti .

Mayweather-a chuan Nasukawa chungchang sawiin, " Fighter ropui tak a ni a, undefeated fighter a la ni reng bawk. Champion ropui anih bakah fighter ropui tak a ni tel bawk. Tenshin, hma lam hun eng tak I nei a, theihtawp chhuah sauh sauh turin ka duh a che, " a ti bawk.

Hemi bout-ah hian Mayweather-a hian US dollar 9 million a hlawh chhuak a, boxer chawl tawh mah nise a thiamna a la sang hle tih a hriat a, pangai taka boxing khelh erawh a tum tawhlo thung.