Mayweather-a record nihrualtu Wanheng

03rd May 2018, 12:05AM

Boxer ropui Floyd Mayweather Jr. chuan vawi 50 a inhnek tawhah hneh loh a la nei miah lo a, hetiang ti thei dang hi an awm dawn lo emaw tih laiin a record rawn nihrual thei pakhat a awm ve tlat.

Thai boxer Wanheng Menayothin chuan a khingpui Leroy Estrada chu round 5-naah hnehin Mayweather-a record hi a nihrual ve ta chiah a. Kum 32-a upa Wanheng hi vawi 50 a chak tling ve ta chiah a ni.

Wanheng leh Panamanian boxer Leroy te inhnekah hian round hmasa berah Leroy hi a che fuh nghal hle a Wanheng mit ko chu a hnek kak nghe nghe a.

An inhnek chhunzawm zel a, boxer senior chu a mit ko kak vang chuan a buai phah lutuk lo a, round 3-naah Wanheng hian a khingpui chu vawi hnih ngawt a hnek tlu a, round 4-naah pawh vawi khat chu a hnek tlu leh a, round 5-naah inhnek an titawp a, Wanheng Menayothin hian WBC minimumweight title chu a humhim ta zel a.

An inhnek zawh hian Wanheng chuan Mayweather-a record a nihrual thei chu lawmawm a tih thu a sawi a. Record ding lai khum a tum leh tum loh zawhna chhangin, chutiang lam chu a la ngaihtuah thleng lo niin a sawi.

Nakhon Ratchasima khuaa inhnek hi Las Vegas boruak te nen chuan a inthlau hle a, Mayweather nen an khingpuite pawh an inlar hleih viau bawk a. Mahse, an hneh zat erawh a inang miau a ni.

Copyright © inkhel.com 2024. All rights reserved.