19 Oct 2018 05:27

inkhel

Mayweather a rawn kir leh dawn: Pacman

Manny Pacquiao chuan kumin December 31 hian Floyd Mayweather chu boxing ring-ah a kir leh dawn nia sawiin, an pahnih hian kum thar May 5 khian inhnek an tum niin a sawi.

Filipino boxer Manny Pacquiao hian WBA welterweight title a kawl mek a, kum thar January thlaah Mayweather-a thian pakhat Adrien Broner nen an inhnek dawn a. Pacquiao hian Broner a hneh hnuah Mayweather nen chuan an inbe tan dawn niin a sawi a ni.

Pacquiao chuan, “Floyd hian December 31 ah boxing ring a luhchilh leh dawn a, keiin January 12 hian fight ka nei dawn bawk a. Hemi hnu hian kan la inhmachhawn leh ngei turah ka ngai a. Broner ka hneh hnuah kan sawi chiang thei ang a. A rawn kir leh ngei dawn e,” a ti.

Manny leh Floyd te hi 2015 khan an inhnek a, Mayweather hi point in a chak a. An inhnek hnu hian Pacman chu boxing ring chhungah vawi li a lut leh tawh a, vawi thum chu a chak a ni.

Pacman hi kum 39 a ni tawh a, Mayweather hi kum 41 a ni tawh thung a. Anni pahnih hian an vanglai an pel tawh ve ve a, mahse Pacquiao hian an pahniha an inhmachhawn leh theih nan theihtawp chhuahin hma a la ngar ngar a. Engmah chiang la awm lo mahse Showtime president Stephen Espinoza chuan anni pahnih inkarah hian inbiakna khunkhan tak a kal chho mek niin a sawi.

Manny Pacquiao chuan, “Kan inhnek leh dawn a nih chuan Mexican chawlh hun Cinco de Mayo (May 5) emaw, July emaw ni thei se ka duh a ni,” tiin a sawi.

Floyd Mayweather chuan chawlh a puan hnuah inlan leh thei tur anga a hming an sawi lanna a nei nual a, UFC fighter pahnih Conor McGregor leh Khabib Nurmagomedov te pawhin hmachhawn ngei an duh thu an sawi nasa viau a ni.