May 1, 2019 hi Formula One San Marino Grand Prix chhiatna rapthlak thlen atanga kum 25-na champha a ni a. Italy rama Imola circuit-a chhiatna thleng kha rei ve tan tawh mahse nimin lawka thleng ang mai a la ni.
A hmasa ber
Europe khawmualpuiah Formula 1 chuan thawm a nei lian viau a, mak tak maiin driver rin kai vak lo pakhat chu pahnihnaah a awm chho a. Brazilian driver la upa lo tak, Jordan team driver Rubens Barrichello chu pahnihnaah a awm mek a, Imola-a an tlan hma chiah, Aida-ah podium a chuang kai thei a, hei vanga pahnihnaa awm thei a. A hma lehin an ram Brazil-ah palina a ni tawh bawk.
Zirtawpniin Imola-ah qualifying an tlan tan a, a chet that kal tluang viau mahse Barrichello chu a che fuh ta bik lo. Qualifying a tlan lai hian Variante Bassa kawng kawiah chuan a tlan dik lo a, a kual zau mah mah a, hei vang hian a sira tyre dah vum chu na takin a va su ta dawt a. A car chu a ding chiang hle a, Barrichello pawh a tlan chak em avangin hetianga a intauh hnu hian nikhaw hre loin a awm zui phah a ni.
Rang takin Barrichello hi an buaipui nghal a, vanneihthlak takin hnar ruh tliak leh a ban ruh na tih bak chu hliam a tuar lo hlauh a ni. He thil thleng hi rapthlak tham viau mahse he kar duhawm lo taka chanchin tha lo intanna chiah a ni.
A pahnihna
Simtek team driver Roland Ratzenberger chu a patuai a la ni a, Grand Prix a tlan vawi thumna tur chiah a la ni nghe nghe a. Inrinnia qualifying an tlan tur chu a tlan hnuhnun ber tur a ni tih erawh a la hre bik hauh lo.
Austrian driver hi Inrinnia qualifying-ah a tlan mek a, Imola track-a tlan chak theihna awm zinga pakhat Villeneuve curva-ah chuan a front wing chu a fel lo thut mai a, 200 mph vela a tlan lai niin, a car chu a thunun thei ta lo a. Ratzenberger chuan a sira bang chu na em emin a su phei ta a ni.
Ratzenberger hi rang takin helicopter hmangin damdawi in lamah an kalpui nghal a, San Marino-ah chuan boruak a fuh tawh lo hle a, team thenkhat phei chuan qualifying tlan chhunzawm chu an duh tawh lo hial a ni.
Hemi niah hian kum 33-a upa Roland Ratzenberger chuan a tlin ta lo a, driver thenkhat chuan Pathiannia intlansiakah pawh tel loh mai an duh thu an sawi chhuak a. Mahse, Simtek driver pakhat zawk Gerhard Berger chuan intlansiaknaa an tel loh avangin a thianpa Roland Ratzenberger chu a dam leh phah dawn lo tih sawiin, tlan theuh turin driver dangte chu a fuih zawk a, intlansiak chu a pangngaiin an neih theih phah a ni.
A bupui
Pathianni a inher chhuak a, intlansiak hun a ni ta a. Hemi season chhunga title inchuh thei ber tura ngaih Ayrton Senna leh Michael Schumacher te chu a ding hmasa pahnih an ni a. Zirtawpni leh Inrinniah te chanchin duhawm lo tak a awm ve ve tawh avangin tu te pawh chuan tluang taka an intlansiak theih an duh hlawm hle a, mihring duhthusam chuan awmzia a neih tam loh zia a lang zui.
Benetton driver JJ Lehto car chu a nuar a, intlansiakna kawng laiah chuan a ding tlat mai a, Pedro Lamy chuan a car hnung chu a rawn sutsak zui a, Safety Car a chhuah phah a. Driver pahnihte hian hliam na an nei lo hlauh a, driver te hi vannei viau mahse a entu lampang tan a lawmawm lo ve leh thung a. Car insut vanga car them leng vel vang chuan a entu mi pakua zet chuan hliam an tuar a ni.
Lap 5 an tlan laiin Safety Car chu pit-ah a lut leh a, intlansiak chu a pangngaiin an chhunzawm leh a. Ayrton Senna chuan hma a hruai a, a hnung chiahah Michael Schumacher chu a tlan bawk a.
Lap 6-ah hmahruaitu Senna chu tlan chak theihna lai, vei lama kawi awmna hmun Tamburello-ah chuan ding lamah a kawi thut a, 130 mph vela tlan niin, bang chu a su bur mai a, intlansiak pawh an titawp nghal vat a ni.
Damdawi lam thiamte chuan rang takin chetsualna hmun hi an pan nghal a, Senna chu helicopter hmangin Bologna damdawi inah an thlawhpui nghal vat a. Ni thum chhungin driver pathum chu damdawi in an panpui ta der a ni.
Theihtawp chhuah mahse damdawi thiamte chuan Ayrton Senna chu an chhan thei ta lo a, vawi thum ngawt world champion lo ni tawh Senna chuan khawvel a chhuahsan ta a ni.