Match Commissioner Training neih a ni

23rd August 2019, 07:08PM

Mizoram Football Association (MFA) hnuaia Referee Committee-in ni hnih chhung awh Match Commissioner (MC) Training an buatsaih chu August ni 23, Zirtawpni khan AR Lammualah tan a ni a, theory class bakah a practical-a hun hmang a ni a, August ni 24, Inrinniah exam neih tur a ni.

MC Training hi Pu Lalrawngbawla, AIFF Match Commissioner-in a kaihhruai MC training-ah hian District hrang hrang atangin mi 27, District FA in an rawn tirh te leh MFA in a kohte an tel a, Pu Lalrawngbawla chuan tunhnaia Football dan thar thahnem tak International Football Association Board (IFAB) in a duan te hrilhfiahin, MC te mawhphurhna san zia te a sawiin Dan kenkawh a pawimawhzia te, inthlahdah a thian loh thu te a hrilh a ni.

(adsbygoogle = window.adsbygoogle || []).push({});

AIFF Match Commissioner chuan football dan thar duante hi inkhelh hun a tam zawk nan tih a nih thu a sawi a. "Minute 90 chhung hian minute 60 vel chiah inkhel ang an ni thin a, minute 30 dawn hi a behbawm neuh neuhah hun khawhral a ni thin, hei hi Football dan duangtu IFAB chuan siamthat a duh a ni," tiin MC te chu dan hre bel turin a chah a; chu chuan inkhel a tih hmuhnawm tur thu leh match conduct a felfai phah tur thu a sawi bawk.

MC tana hriat makmawh thil tam tak Field of Play (FoP) leh a behbawm dang bakah buaina a chhuah thulh a thutlukna siam dan tur te, inkhelh that buatsaih dan tur chungchang te, beisei loh thil a lo thlen thulha chet lak dan tur thil tam tak AIFF Match Commissioner chuan lehkhabu atangin a hrilh fiah a. Mizoram pawn lama a tawn hriat tawh thil tam tak a hrilh bawk a ni.

MFA Referee Committee hian nimin lamah Referee Clinic a lo buatsaih tawh a, MFA Referee engemawzat chu Football dan thar te zirtir a hrilhfiah an ni tawh a, tunhnaiah dan thar a tam em avangin a nih ang diak diak a hman nghal mai theih lohte a awm a, a pawimawh leh langsar tak takte chu Mizoram Premier League (MPL 8), September ni 5, 2019-a khelh tan turah hian hman nghal an ni dawn a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.