UFC fighter Jorge Masvidal chuan boxing ring-a luha, Floyd Mayweather nena inhnek a chak thu a lo sawi tawha, mahse Mayweather hi a retire tawh bawk nen he boxing bout hi a thlen hmel loh.

Heti anga Masvidal a tawngchhuah hnu lawk hian Masvidal hi tunlai boxer lar ber zinga mi Canelo Alvarez nen inhnek tur anga sawizawm an ni nghala, Alvarez hian Masvidal chu sum siam nana boxing ring-a inhnekpui chu a hreh bik lo.

Masvidal hi tunlaiah chuan UFC mai ni lovin MMA fighter lar ber zinga mi a ni chho meka, Alvarez pawh hi boxing khawvelah tunlai hian ani aia lar an awm bik lova, he fight hi a thleng a nih ngat chuan sum che vel a pui leh hle tura ngaih a ni.

TMZ Sports chuan Avarez chu Masvidal nena inhneh a duh leh duh loh chungchang zawtin, Avarez chuan, “MMA fighter a ni a, sum siam nan te chuan engvangin nge ka hnek duh loh teh lul ang?,” tiin a lo chhang.

Masvidal hi a hnek na a, vawi kha hnekah a tumpuite knock-out thei khawp ni mahse Alvarez erawh boxer a ni miaua, Masvidal hi an inhnek a nih chuan underdog a ni ngei dawn.

UFC fighter Conor Mcgregor pawhin boxer ropui retire tawh Mayweather hi a lo cho chhuak tawha, mahse Mayweather hian harsa lem lo takin boxing ring-ah a lo hneh tawh a ni.