MC Mary Kom chuan Women’s World Boxing Championship neih mekah a khingpuite hneh zelin semi final a lut ta a, Indian boxer chhuanvawr hian medal chu a dawng dawn chiang ta a ni.

Kum 35-a upa Mary Kom hian 48kg category quarter final-ah Chinese boxer Wu Yu a hmachhawn a, fa pathum nei tawh Mary Kom hi a chak chiang hle a, 5-0 ngawtin a chak a, semi final hi a lut ta a ni.

Women’s World Boxing Championship neih hma hian Mary Kom chuan gold medal panga leh silver medal pakhat a lo dawng tawh a, World Championship medal a dawn hnuhnun ber chu 2010 ah daih tawh khan niin, hemi tum hian 48kg category-ah gold medal a dawng a ni.

“A khirh ve khawp mai a, chuti lutuk chuan hautak lem lo mahse khelh awlsam tak chu a ni hauh lo a. Chinese boxer tha tak tak an awm nual a, ka hmachhawn ve nual tawh a, mahse Wu Yu hi chu ka la hmachhawn ngai lo a, a chet dan pawh ka la man vak lo a ni,” tiin Mary chuan a sawi.

“Kan inhnek chhoh deuh hnu khan a khelh dan pawh ka man chawp a, lo hmachhawn dan tur pawh ka ngaihtuah chho nghal vat a, a hnuah kha chuan harsatna lutuk ka nei ta lo,” a ti bawk.

Olympic bronze medallist hian semi final-ah North Korean boxer Kim Hyang Mi chu a hmachhawn leh dawn a, Nilaithawhtan hian an inhnek dawn a. Kim Hyang Mi leh Mary Kom te hi nikum khan Asian Championship-ah an lo inhmachhawn tawh a, hetah hian Mary Kom hi a chak zawk a, chuvangin final lut thei ngei turin beiseina a nei sang hle.

World Boxing Championship neih hma hian Irish legend Katie Taylor leh MC Mary Kom te chu medal lak tam lamah an inang chiah a, mahse tun tournament-ah Mary hian medal a lak ngei dawn avangin Katie Taylor ai chuan a chungnung thei tawh dawn a ni.