Mary Kom ngaisangtu ka ni: Sunil Chhetri

12th July 2019, 10:07PM

Sunil Chhetri chuan ngaisangtu a ngah hle a, India rama football khel thinte chuan an ngaisang hlawm viau a. Hetih lai hian Chhetri chuan Indian boxer ropui MC Mary Kom chu a ngaisang hle niin a sawi ve thung.

Indian striker Sunil Chhetri chu khawvela football khel mek zingah ram tana goal thun hnem ber dawttu a ni mek a. India aiawhin vawi 109 a feh chhuak tawh a, hengah hian goal 70 zet a thun tawh a. Ram tana khel hnem ber a nih bakah goal thun hnem ber a ni tel bawk a ni.

Mi tam takin Chhetri hi an ngaihsan viau laiin amah pawhin ngaihsan zawng a nei ve nual hlawm a. Heng zingah hian vawi 6 ngawt world champion lo ni tawh MC Mary Kom chu a ngaisang hle tih sawiin, Manipuri boxer chu kawng tam takah a entawn thin tih a sawi.

Hmanni lawkah India captain Chhetri hi AIFF Player of the Year atan an thlang a, he chawimawina hi vawi 6 a dawng tawh a, amah aia dawng hnem hi an la awm lo a ni.

Chhetri chuan, “Ka chhehvelah hian min kaihruaitu tur hi ka fawm khawm thin a, mi chi hrang hrang, anmahni kalna lama hlawhtling tak takte chu ka entawn thin,” a ti.

“MC Mary Kom hi ka ngaihsan leh entawn nasat berte zinga mi a ni a. A chanchin hi a ropui ka ti a, hlawhtling tura a kawng zawh hi awihawm loh khawp hial a ni a tih theih. Vawi 6 ngawt mai world champion a ni thei a, phir a hrin hnuah pawh world champion a la ni leh thei a, fa pathum neih hnuah pawh world champion ni thei hi chu dah hniam theih a ni lo,” a ti bawk.

A sawi zelnaah, “A pumpuiah gold medal 14 ngawt mai a la tawh a, Asian Games, Asian Championship leh Commonwealth Games bakah a dang tam takah medal a lo la teuh tawh a. Hetiang taka mi ropui hian India a chawk tho thei lo a nih chuan tu dangin nge thei chuang ang? Mary Kom ngaisang ber pawl ka ni,” a ti.

Sunil Chhetri hian Mary Kom nunah chuan tlawm mai a tum lohna lai tak chu a duh em em a ni tih sawiin, hetiang taka rilru paukhauh chu a ngaihsanna tizualtu leh zah a kai lehzualna a nih thu a sawi.

“Mary hian tlawm mai te, beidawn mai te hi a tum hauh lo a. Engmah hi tlai lua a awm lo a, tum phawt chuan engkim a tih theih tih hi amahah hian a chiang a. Theihtawp kan chhuah phawt chuan kan duhzawng chu kan tipuitling thei zel dawn a ni tih hi Mary Kom nun atang hian a chiang hle a ni,” tiin Sunil Chhetri chuan a sawi a ni.

Copyright © inkhel.com 2024. All rights reserved.