Mary Kom-i’n final a lut

23rd November 2018, 02:11AM

MC Mary Kom chu New Delhi khawpuia Women’s World Boxing Championship khelh mekah a la chak zel a, semi final-ah a khingpui Kim Hyang-Mi hnehin final a lut.

Women’s World Boxing Championship 2018 semi final-ah Mary Kom chuan North Korean boxer Kim Hyang-Mi chu a hmachhawn a, KD Jadhav Indoor Stadium-ah vawi nga ngawt world champion lo ni tawh Mary chu a chak zawk a, Irish boxer Katie Taylor nen record an chelh dun mek chu a khum thei dawn chiang tawh a ni.

Kum 35-a upa Mary Kom hian 2002, 2005, 2006, 2008 leh 2010 te khan gold medal a lo la tawh a, 2001 khan a vawi khat telnaah silver medal a la tawh bawk a. World Championship bikah Manipuri boxer hian medal 6 a la tawh a, Katie Taylor nen an medal lak zat hi a inang chiah a, tun tumah Mary hian gold medal emaw, silver medal emaw a lak belh leh dawn chiang tawh a, hei vang hian a chungnung thei tawh dawn a ni.

Inhneh tan atangin Mary chu a chungnung nghal zawk a, a hniam zawk mah ni se fimkhur tak chungin a che a, first round chu a la chiang a. Second round-ah Kim Hyang-Mi chuan a nawr na ve hle a, mahse Mary chuan a lo bum hnem bakah counter-attack tha tak maiin a lo chhawn thei zel bawk a. Round hnunhnung berah Mary chuan a thiam a sawm khawm leh a, ban sei zawk leh sang zawk Kim chuan a ban seina leh a sanna chu hman tangkai tum viau mahse a hlawhtling thei meuh lo a ni.

A tawi zawk leh ban pawh sei lo zawk Mary Kom chuan a thiamna a hmang tangkai a, thluak fim takin a khel a, a che kual reng a, hei vang hian a chan a tha ta zawk a ni.

Inrinni hian MC Mary Kom chuan final-ah Ukraine boxer Hanna Okhota a hmachhawn dawn a. Hanna Okhota hian semi final-ah a khingpui Japanese boxer Madoka Wada chu hnehin final hi a lut ve bawk a ni.

Mary chuan, “Final-ah chuan theihtawp ka chhuah dawn a. He boxer nen hian Poland-ah kan inhnek tawh a, chumi tum chuan ka hneh a. Tun tumah hian eng pawh thleng thei a ni a, a hmaa ka hneh tawh vang ngawta inthlahdah chi a ni dawn lo a, ring chhungah chuan tha thlah miah loh a ngai dawn a ni,” a ti.

Copyright © inkhel.com 2024. All rights reserved.