Martina Hingis - 39

01st October 2019, 12:10AM

Martina Hingis chuan kum 39 a pumhlum ve ta a, tennis khawvela ‘Forever Young’ tia hriat lar em em hian kum hnih kaltaah khan tennis khelh a lo chawlhsan tawh a ni.

Hingis chuan tum hnih ngawt mai tennis khelh a chawlhsan thu a puan hnuah a inkhel leh thin a, a vawi thumnaah chuan kum 37 mi niin a chawlhsan tak tak tawh a. 2003 kumah khan a vawi khatna atan a chawlh thu hi a puang a, hemi hnuah hian a inkhel leh a. 2007 kumah khan a chawlh thu a puang leh a, chumi hnuah pawh chuan kir lehin, a tawpna atan 2017 kumah khan a chawl ta tak tak a ni.

Chawlh a puan hnua a kir leh apiang hian Hingis thar a inlar hi a ni ringawt zel a. Grand Slam title eng emaw zat lain, WTA title te, Olympic medal te leh Tier I singles title 17 ngawt a la hman bawk a, hnuhma duhawm tak a hnutchhiah teuh hnuah tennis khelh chu a bansan tak tak tawh a. A vanglai hian title lian 25 zet a la hman a ni.

Tun thlengin Martina Hingis hi Open era bikah chuan Grand Slam champion thei naupang ber a la ni reng a, 1997 kumah khan Australian Open final-ah Mary Pierce hnehin a champion a, kum 16 leh ni 177 a upa a ni a, title lian tham la thei naupang ber dawttu a la ni mek bawk a. Swiss tennis star thin hi tennis player zingah chuan World No. 1 ni thei naupang ber a ni bawk a, 1997 kumah World No. 1 hi a ni a, kum 17 a la tling lo.

A zawnin kar 209 chhung chu Martina Hingis hi hmeichhe singles ranking-ah No. 1 a ni thei a, kar 90 chhung chu a zawnin hmeichhe doubles bikah World No. 1 hi a ni thei bawk a. Singles leh doubles World No. 1 hi a rualin kar 29 chhung chu a ni kawp thei bawk a ni.

Grand Slam junior championship title la thei naupang ber niin, ‘Swiss Miss’ hian kum 12 a nihin French Open title a la a. A kum lehah kum 13 mi niin French Open title chu a la leh a, hei bakah hian Wimbledon title a la bawk a, US Open final a lut thei bawk a ni.

Kum 14 a tlin kumah senior lamah a khel tan a, kum 16 a nihin Grand Slam title a la tan a, kum 18 a tlin hnuah erawh singles major title a la thei tawh lo thung.

Kum 15 leh thla 9 a upa Martina Hingis chu Helena Sukova nen an tang dun a, 1996 Wimbledon Championship-ah an champion a, khawvel mak tih pawh a hlawh viau mai a. A hminga Martina tih a tel chhan pawh tennis player ropui Martina Navratilova hming chawia an phuah vang niin, tennis player ropui tak a ni chho ve leh a. A nu pawh professional tennis player a nih thin bakah coach a ni chho zui bawk a ni.

Martina Hingis hi Swiss mi niin, tawng chi hrang hrang panga chu a thiam nal hle a, Swiss German, Standard German, Czech, English leh French te chu nal takin a hmang thei a ni.

Copyright © inkhel.com 2024. All rights reserved.