13 Aug 2019 05:36

inkhel

Martial hi Thierry Henry ang a ni thei: Scholes

Paul Scholes chuan Anthony Martial chu Manchester United tana Thierry Henry ang a nih theih a beisei thu a sawi.

Manchester United chuan France forward Anthony Martial lakah beiseina an nei sang hle a, an ram mi, Premier League player ropui tak lo ni tawh Thierry Henry hnung zui thei tura an beisei a nih thu an sawi a ni.

Anthony Martial chuan Old Trafford-ah boruak a la nei lian tawk lo hle a, 2019-20 season atang chuan thawm lian tham tak a siam chhoh ve theih tawh an beisei thu Red Devils thuneitute chuan an sawi a. A hma kha chuan han che tha chho ve deuh thin mahse tawp chin a la nei zel a, tunah chuan a tawp thlenga tang mar thei tawh turah an dah a ni.

Ole Gunnar Solskjaer chuan Martial chu season bul tanna atana an game hmasa bera Chelsea nen an inkhelh tum khan central striker angin a khelhtir a. Kha inkhelah khan Martial chuan goal a thun a, a tawpah 4-0 in an chak nghe nghe a ni.

Khelmual chhunga taima ve tak mai Martial chu a changin Marcus Rashford nen pawh an intlan thleng zeuh zeuh a, Chelsea nen an inkhelh tum khan chutiang chuan an ti nual a, a sir lamah te Thierry Henry tih thin angin a tlan ve nual a ni.

Manchester United legend Paul Scholes chuan Anthony Martial chu a nih dan tur ang tak a la ni pha lo nia a ngaih thu sawiin, theihtawp a chhuah chhoh zel chuan khawvel huapa a tha ber pawl a nih theih tur thu a sawi chhuak.

Scholes chuan, “Harry Maguire tih dan anga tlar hnung an ven that a, Aaron Wan-Bissaka pawh a chet that chhunzawm zel theih chuan a ziaawm dawn khawp mai a. Chutiang bawkin tlar hma lamah Anthony Martial leh Marcus Rashford te an inkawp fuh a, a sir lamah pawh duhtawka an che thei zel a nih chuan eng team mah hi an huphurhawm ka ring lo,” a ti.

“Vei lam sira Martial a tlan fo hi thil tha tak niin ka hria a, a pawina ka hre hauh lo a. Thierry Henry khelh thin dan kha in ngaihtuah let leh chuan centre-forward angin a tirah a khel a, a hnu lamah chuan vei lam sirah khan a awm deuh zel a. Khatiang kha rilruah a rawn lang a, a fuh hlein ka hria a. Martial pawh hi Henry ang kha a ni thei ngei ang tih ka ring tlat ani,” a ti bawk.

Martial leh Rashford te chu tlar hma lamah tha ve viau mahse United chuan duhthu sam chiah lohna lai an neih nual thu Scholes chuan a sawi a. Khelmual laiah thawm that ngai a la awm nual nia a hriat thu a sawi.

England midfielder hlui Scholes chuan, “Chelsea nen an inkhelh tum khan Andreas Pereira kha a pangngai viau a, mahse tan lak erawh a la ngai khawp mai a. Chutiang bawkin Scott McTominay pawhin theihtawp a la chhuah chhoh zel a ngai tih a lang chiang hle,” a ti.

“Team khauh tak an hmachhawn hunah lehlam pawlin an hriat fuh laklawh chuan a pawi dawn a, tun atanga an insiam that vat a pawimawh hle a. Chuti a nih loh chuan na takin an nawr ang a, counter-attack an dawl zo lo ang tih a hlauhawm a ni,” a ti bawk.