Martial hi kan chet that theihna chhan: Daniel James

12th November 2019, 10:11PM

Daniel James chuan Anthony Martial inkhel leh thei tawh chu lawmawm a tih thu sawiin, tun hnaia Manchester United chet that theihna chhan pakhat a nih thu a sawi.

France forward Anthony Martial chu a inhliam avangin thla hnih dawn chu chhawr theih lohin a awm a, October 20 ah khan Liverpool leh Manchester United te 1-1 a an inhnehtawk tumin substitute bench lamah hun a hmang ve leh tan tawh a ni.

Red Devils hian hemi hnuah match 6 an khel zui a, hengah hian vawi 5 an chak thei a, Bournemouth lakah 0-1 in an tlawm bawk a ni.

Pathianniah khan Brighton and Hove Albion chu Manchester United hian 3-1 in an hneh a, he inkhelah hian Anthony Martial, Daniel James leh Marcus Rashford te chu an che tha hle a. An chak vang hian Red Devils chu Premier League-ah pasarihnaah an awm theih phah a ni.

Kum 22-a upa Daniel James chuan hetiang taka an chet that chhoh tan theihna chu Anthony Martial inhliam a dam leh tawh vang nia a ngaih thu hi a sawi chhuak.

James chuan, “Anthony Martial a rawn kir leh hnuah chuan kan mumal leh sawt a, kan chak chho leh deuh vek a. Amah hi player tha tak mai a ni a, team tana tangkai em em mai a ni. A bik takin kei leh Marcus te tan hian a tangkai lehzual a, kan inthlawp fuh chho hlawm em em a ni,” a ti.

“A rawn kir leh hnuah goal a thun leh tawh a, mi goal thun tur a siamsak bawk a, kan tan chuan chanchin lawmawm tak a rawn thlen zel a. A nihna takah chuan heti taka hma kan sawn chhoh leh theihna chhan pakhat hi chu a ni a tih loh theih loh,” a ti bawk.

United tan boruak siam chho viau mah se Anthony Martial chu Euro 2020 qualifying khelh turah France squad-ah chuan an telh lo thung a. Coach Didier Deschamps chuan Monaco star hlui chu a ruahmannaah chuan a la tel reng tho niin a sawi thung.

Copyright © inkhel.com 2024. All rights reserved.