Manchester United chuan Premier League game-ah team khawng Tottenham chu Old Trafford-ah an mikhual a, hun tawp dawnah bench atanga lut Martial goal khat hmangin United hian si khat faiin Spurs hi an hneh ta a ni.
First half-ah Spurs an chungnung zawk, second half-ah erawh United an khel tha hle a, goal hlauhawm an nei nual. Rashford thlaktu Martial chuan Lukaku tauh per chu box chhungah um lutin cool takin a pet goal ta a ni.
Manchester United 1-0 Tottenham
(Martial 81')
Man Utd XI: De Gea; Bailly, Jones, Smalling; Valencia, Herrera, Matic, Young; Mkhitaryan, Lukaku, Rashford.
Spurs XI : Lloris; Aurier, Alderweireld, Vertonghen, Davies; Dier, Winks; Sissoko, Dele, Eriksen; Son.
A tir atangin United-in an nawr nghal, minute 15 an khelh tlin hma hretin Rashford chuan 25 yards atangin free kick tha takin a pet; bottom corner-ah a leu phei, mahse Lloris chuan a lo beng per hman hlauh. Hemi hnu atang chuan Tottenham lamin game an thunun ta.
Spurs game a tha a, ball an inpe kual nalh thin hle, hetih lai hian United final third-ah thil ropui an ti thei bik lo. Alderweireld chuan box pawn atangin dinglam sirah kawh zetin a pet, a goal teuh hle, Dier pawhin set piece atanga ball kal zel a volley, mahse duhthusamin a pet thei lo, De Gea tan harsatna a thleng lo. First half tawp dawn lamah United lamin an nawr ve leh thung a, half time a nih chuan goal awm lovin an inhnehtawk.
Second half tir lamah Lukaku leh Rashford te chuan chance hlauhawm vawi hnih an nei nghal. Mkhitaryan shot chu Lloris chuan a lo dang per, Rashford chuan a pet goal dawn nia a lan laiin Davies a lo la awm hlauh, Davies chuan a clear ta a, hemi hnu chiah hian box veilam atanga Mkhitaryan cross chu 6 yard box-a lo awm Lukaku chuan a tawk thei lo hlauh bawk.
Corner atanga ball kal zel chu box pawn atangin Valencia chuan a shot, a goal ngei dawn nia a lan laiin a leu chhuak. Lukaku pawhin free ball khalhin box veilam sir atangin a shot, hei hi Lloris chuan a lo dan sak bawk. Hun tawp dawn minute 14 a la awm tihin Spurs chuan chance tha lutuk an nei, box pawn atanga Eriksen chip tha zet chu box chhunga tlan lut Alli chuan chuan a pet goal teuh hle.
Spurs-in chance an neih zawh chiah hian Lukaku chuan Spurs goal post a tauh per. Mual dinglam sir atanga Lingard cross tha tak chu Lukaku chuan tauhin Lloris chuan a ban phak lo chiang hle, hetih lai hian Spurs an vannei hlauh, goal banin a lo dang. 81 mins-ah United chuan an tih goal ta nge nge.
De Gea ball pet chhuah chu Lukaku chuan tauh perin hei hi Martial chuan box chhungah a um lut, far post lamah cool zetin bench atanga rawn lut Martial chuan a pet goal ta. Si khat faiin United chuan hma an hruai. Hun tawp dawn tak tak 89 mins-ah Lingard chuan free takin ball a tlanpui, a pet goal ngei tawh dawn nia a lan laiin a pet over chiang hle.
Manchester United-in Pogba leh Fellaini inhliam an tuar tih a lang thin, midfield nei tha an hmachhawn tum hian midfield-a chet hleihtheih loh chang an nei thin. Hetih lai hian Matic a la awm hlauh a, ani hi game tin a khel tha vek tih mai tur khawp hian a tlo a, United innghahna a ni mek kan ti thei awm e.
Dier a khel tha hle a, United attacking a dangchat nasa hle. Tin, Winks pawh United tan buaipui tham a ni. Martial hi a start aiin bench atanga a rawn luh hian a che tha thin tih chiang takin a lang chho zel. Harry Kane awm loh Spurs-in an tuar hle, first half-ah midfield-ah game thunun hle mahse chance tha an insiam hleithei lo.
Jose Mourinho a fakawm, first half-ah Spurs an chetha zawk, second half-ah erawh United hian chak an phu zawk tih a lang chiang. United tlarhnung an khawng a, an mamawh point 3 an hlawhchhuak bawk a, game hmuhnawm tak an khel bawk, United chuan Liverpool an draw hnuah Huddersfield an hneh lo, tunah erawh team tha Spurs lakah point 3 an hlawhchhuak, kawng dik an zawh chho tan leh ta e.