Marseille-in United hnenah Strootman an sihhmuh

23rd May 2019, 06:05PM

French club Marseille chuan an midfielder Kevin Strootman chu chhuah tir dan an ngaihtuaha, Manchester United hnenah loan-a chhuah tir an tum niin Sky Sports chuan a tarlang.

Marseille hian Strootman hi United mai bakah Everton leh West Ham hnenah pawh an sihhmuh niin tarlan a ni.

Kum 29 mi Strootman hi David Moyes leh Louis Van Gaal-ten United an enkawl lai khan United chuan lakluh an lo tum tawh thin a, mahse an hlawhchham.

Strootman hian nikum nipui lai khan pound maktaduai 23-in Marseille hi Roma atangin a pan a, Marseille tan pawimawh nghal hle mahse Marseille hian an sum sen an tih tlem a ngaih avangin Strootman hi loan-a chhuah tir dan an ngaihtuah mek.

Manchester United hian an midfielder Ander Herrera an lo chan tawh bawk nen Dutch midfielder Strootman hi an lakluh duh mai a rinawm viau a, Strootman hi season tharah Premier League-ah a khel lovang tih a sawi theih loh.

Everton lam pawh hian an midfield thuam that an duh mek niin chanchinbu mite chuan an tarlanga, Strootman hi United in an lalut lo a nih chuan Goodison Park-ah thlem luh ngei an tum dawn niin a langa, West Ham manager Manuel Pellegrini pawhin Roma midfielder hlui Strootman hi a iai lo hle niin tarlan a ni bawk a ni.

Copyright © inkhel.com 2024. All rights reserved.