23 Jul 2020 10:32

bakteaJr.

Mizo tlangval

​Marquez a intlansiak leh thei nghal

MotoGP world champion Marc Marquez chu tun season-a an race hmasa ber Spanish GP-ah tlusualin, a ban ruh titliak mahse, race awm leh hmasa ber turah a inlan leh thei nghal dawn.

Sunday liamtaa Spanish GP-ah Marquez hian a ban ruh a titliaka, damdawi in lam panpui nghal niin, zai a ni a, hun eng emaw chen a chawlh a ngai dawn emaw tih laiin, a rawn kir leh nghal dawn.

Marquez hi Barcelona-ah Thawhlehni khan zai niin, tunah hian medical a paltlang tawha, tun Sunday-a Andalusia GP-ah hian rin loh takin a hmel kan hmu dawn a ni.

Kum 27 mi Marquez hi MotoGP surgeon lar tak Dr. Xavier Mir chuan a zaia, a banah hian a ruhah plate leh screw te dah niin, a nerve chhia a awm lo hlauh bawk.

Daktawrte leh Honda lam chuan Marquez hi Andalusia GP-ah hian a inlan theih loh tur lo sawi tawh mahse, Marquez hian Sunday lo awm tura inlan ngei a tum thu a sawi thunga, medical pawh a paltlang tawh avangin rokhlawhna dang a awm loh chuan a hmel kan hmu ngei dawn a ni.