Opponent te box a space (hmun ruak) zawng hmu thiam emaw insiam thiam striker kan sawi a nih chuan Sergio Aguero tluk zeta thiam pro-footballer zingah an thahnem tehchiamin a rinawm loh. Engtin tak nge a tih thin ni? A (Aguero) kamchhuak lo thailang ang hmiang.
A tir atanga zawn nghal a pawimawh
Box chhunga space zawn hmuh hian goal thun a tih awlsam phah hle. Heng hmun awl te hi inkhelh tirh minute 10 chhunga kan zawn vat vat thiam chuan a tangkai lehzual. Chu chuan goal hmahruai khungna kawngah min pui vat thei bawk. Goal kan khung lawk lo a nih pawhin a pawina a awm reng reng lo.
A tir atanga space kan zawng nghala kan hmu mai lo a nih pawhin kan opponent te defend duh dan, an tactic kan man thuai mai dawn a ni. Engang tactic nge an hman tih atangin kan insiam rem ve lehzel mai ang. A laiah an khawng tlat a nih chuan a sir lama tawlh chhuah changte ka neia, tin, ka tawlh let hnem bawk. Ball ka khawih tam phaha, bal khawih tam na na chuan inrintawkna ka neih phaha, game khelh ka awlsam phah hle.
Ball khawih hmasatu nih zel ka tum
Engtiklai pawhin inringin kan awm tur a ni. Ball ka lama a rawn kal a nih chuan mi tawh turah ka dah ngai lova, tawk hmasa tu nih chu ka tum ber a ni fo. Nasri leh Navas ten ball an chanin an cross hun nghakin ka lo inring ran tawh thin a. Far post nge near post ah an cross dawn tih thlengin an chet dan ka lo zir nasa thin hle. Chutiang bawkin Silva a'n a lai atanga ball min pe a nih chuan ball tha a ni emaw ni lo emaw opponent te aia tawk hmasa tu nih ka tum reng thin.
Tlan kual tam a pawilo
Defender te chhaih buai ka tum ber a ni a, chutiang ti tur chuan ka awm hle hle ngai lova, mual chhung khawiah pawh ka tlan kual mai thin. Tunlai football khawvelah nuamsa takin eng team defender te mahin an opponent striker te an tal tir tawh ngai lova, striker tan penalty area ringawta tal hian kawng ro a su ber hran lo.
Chance insiam tur chuan box pawnah te kan tlan chhhuak ve tur a ni a, final shot ringawt a ni lova, goal khungna kawngah tih tur pawimawh a tam lutuk. Thluak vawrh thiam te pawh a ngai fo.