Southampton chuan tun Premier League season kal mekah khelh 14 atanga point 9 chiah an hlawhchhuah hnuah an manager Mark Hughes an ban a, Hughes thlaktu tur hi a la hriat loh.

Hughes thlaktu tur hi hriat theih la ni lo mahse media lam chuan Soton hian RB Leipzig manager hlui Ralph Hasenhuttl chu an duh niin an tarlang nasa hle. Hughes hi Soton manager a nih atanga thla riat hnuah ban a ni a, tun season-ah Soton chu khelh 14-ah vawi khat chiah hnehna a la chanpui a, vawi sarih tlawmpui tawhin vawi ruk an tumpuite an inhnehtawkpui tawh bawka, tunah hian Premier League table-ah 18-naah an awm mek.

Hasenhuttl hian kumin May thlaa Leipzig a chhuahsan hnuah club enkawl a la nei leh lova, Austrian manager hian German club hi kum hnih chhung a enkawl. Season liamta khan kum 51 mi hian Leipzig chu Bundesliga-ah parukna a nih puia, contract chungchangah club nen an inrem theih loh avangin Leipzig hi a chhuahsan.

Hasenhuttl hian Leipzig a enkawl hnua a season hmasa berah mi tam zawk beisei loh takin Bundesliga-ah Leipzig chu pahnihna a nih puia, Bayern Munich chiah an pha lo. Hasenhuttl hian German club dang Ingolstadt pawh kum 2013 atanga kum 2016 thleng a lo enkawl tawh.

Southampton hian sawi tawh angin manager thar an la nei lova, nilai ni a Wembley Stadium-a Tottenham an luhkhung hunah first-team assistant coach Kelvin Davis chuan manager hna a thawk rih dawn. An game hnuhnung berah Southampton hian Manchester United an inhnehtawk puia, 2-0 a hma an hruai hmasak zet hnuah goal hnih an chhuah zui a, point khat chiah an hlawhchhuah phah ta a ni.