March thlaah Nick Diaz a kir leh tawh dawn

16th November 2018, 10:11PM

Nick Diaz chu hun rei tak a chawlh hnuah kum tharah khian UFC khawvelah a inlan leh tawh dawn niin UFC president Dana White chuan a sawi.

UFC welterweight fighter Nick Diaz (26-9) hian UFC 235 neih hunah Jorge Masvidal (32-13) chu hmachhawn a inhuam thu a sawi chiang tawh a, hei hi an kaltlangpui a nih chuan Las Vegas khawpuia T-Mobile Arena-ah Diaz te hi welterweight division-ah an inbei dawn a ni.

Strikeforce champion hlui Nick Diaz hian January 2015 khan Anderson Silva a hmachhawn a, hetah hian a chak lo a, hemi hnu hi chuan Octagon chhungah a lut leh ta miah lo a. Diaz leh Silva te hi a hnuah drug test an neihnaah an tling zo lo ve ve a, hei vang hian an inbei result pawh thlak danglam niin no-contest angin an dah zui a ni.

Nevada State Athletic Commission chuan a taksaa marijuana metabolites an hmuh avangin Nick Diaz hi thla 18 chhung atan an hrem a, hemi hnu hian United States Anti-Doping Agency chuan an hrem ve leh a. 2017 khan drug test la zawh fel loh pathum chu an hmu zo lo a, chin hriat lohin a bo hmak mai a, hei vang hian Nick Diaz hi an hrem phah a. Kumin April thla atang khan inbei leh thei turin a chunga hremna te chu a hmachhawn zo vek tawh a ni.

Kum 34-a upa Jorge Masvidal chuan ESPN hnenah UFC in Nick Diaz nen inbei tura an biak thu hi a sawi a, mahse Diaz hian a pawm dawn leh dawn loh a hriat loh thu a sawi a. Masvidal hi nikum November thla hnuah khan inhliam vangin a la inbei leh ta miah lo a ni.

UFC lightweight star Nate Diaz u Nick Diaz hi October 2011 hnuah a la chak leh miah lo a, 2013 khan Georges St-Pierre chu UFC welterweight championship-ah a hmachhawn a, unanimous decision in a chak ta lo a ni.

Copyright © inkhel.com 2024. All rights reserved.