21 Jul 2020 05:49

inkhel

Marc Marquez an zai hlawhtling

MotoGP champion lai Marc Marquez chu Pathiannia Spanish Grand Prix an tlanah a chesual a, a ban a tikhawlo a, hlawhtling takin an zai.

Honda rider Marc Marquez chu Jerez-a an intlansiaknaah lap 22 an tlan mek tihin a chesual a. Track pawnah a tlu chhuak a, a bike chuan a delh phei zui bawk a ni.

A chetsual hnuah hian a nghawng an cher nghal a, ambulance hmangin circuit chhunga medical centre ah an kalpui nghal a. Vawiinah khan Barcelona khawpuia damdawi inah an thlawhpui a, hlawhtling takin an zai a ni.

A ban ruh dinglam chu Dexeus Hospital doctor te chuan an zai a, a zaitu Dr. Xavier Mir leh a thuihhruaite chuan a ban ruh tliak chu an siam that thu sawiin, pawi thui lehzual a thleng lo niin an sawi.

Marc Marquez hi eng chen nge a inhliam vang hian a chawlh dawn tih sawi theih a la ni rih lo a. Dr. Mir chuan a thazam a khawih pawi vak lo a nih phei chuan August thla tir lama Czech Grand Prix ah pawh a inlan ve thei mai thei niin a sawi a ni.

Marquez hi tun kar tawpa Jerez-a Andalusian Grand Prix intlansiakah chuan a tel thei dawn lo chiang a, Honda team chuan a aiawh tur hi an ngaihtuah dawn lo tih an sawi a, heti a nih chuan Repsol Honda aiawh tur chu Alex Marquez chiah a ni dawn a ni.

LCR Honda rider Cal Crutchlow pawh a ban rek zai a ngai ve bawk a, Pathianni khan a ban rek hi a tina a, vawiin lamah hian an zai ve tho a rinawm a ni.