Manuel Neuer chuan vawiinah hian kum 34 a tling ve ta a, Bayern Munich leh Germany goalkeeper hi a la kal tluang hle a, a zinkawng a la tawp mai lo tura ngaih a ni.
Club leh ram tana captain ni kawp ve ve Manuel Neuer hian Bayern Munich chu a zawnin Bundesliga title vawi 7 a lakpui thei a, UEFA Champions League title a lakpui theih bakah, kum 6 kal taah khan Germany chu FIFA World Cup title a lakpui a ni.
Marc-Andre ter Stegen che tha chho em em mah se Schalke star hlui hi Germany No. 1 a la ni thei reng tho a. Season thar tan leh hunah pawh Neuer hi Alexander Nubel ai chuan Bayern Munich tana bul tan tura rin kai zawk a la ni reng a ni.
A piancham pual hian a chanchin thenkhat langsar zualte han lawr khawm ila.
576 - Neuer hi 2006-07 hnuah Bundesliga player zingah inelna hrang hranga senior team tana inlan hnem ber a ni a. Schalke leh Bayern Munich tana a inlan zat hi vawi 576 a ni.
92 - June 2009 atangin Neuer hi ram aiawhin a feh chhuak tan a, September 2016 atang khan captain a ni tawh a. Tun thlengin Germany aiawh hian vawi 92 a khel tawh a ni.
5 - Bundesliga huangah club pahnih tan vawi 150 chuang inlan thei hi panga chiah an la awm a, Neuer hi Schalke tan vawi 156 a inlan hman a, Bayern tan vawi 241 chu a khel tawh bawk a. Goalkeeper dangte chu Richard Golz, Gerhard Heinze, Eike Immel leh Ulrich Stein te an ni.
188 - Bundesliga goalkeeper zingah clean sheet nei hnem ber dawttu niin, vawi 188 chu goal a venghim tawh a. A aia goal venghim hnem awm chhun chu Oliver Kahn (196) a ni.
47 - Game 4 khelhah Bundesliga goalkeeper zingah chuan Neuer (47%) chu clean sheet nei hnem ber a ni. Bayern Munich tana a game khelh zawng zawngah 52% ah chuan clean sheet a nei thei a ni.
20 - World Cup winner Neuer hian Bundesliga season khat chhungin clean sheet a nei hnem thei ber a. 2014-15 leh 2015-16 ah te khan clean sheet vawi 20 ve ve neiin, 2001-02 a Oliver Kahn-a clean sheet vawi 19 nei record chu a khum ve ve a ni.
107 - 2007-08 season-ah UEFA Champions League a khel ve tan a, hemi atang hian vawi 107 zet chu a inlan tawh a ni.
42 - Neuer hian UEFA Champions League-ah pawh clean sheet vawi 42 ngawt a nei thei a, hei hi record a tling ve bawk a ni.
35 - Tun season tir lamah khan Neuer hian Bayern Munich tana clean sheet nei hnem record thar a siam a, vawi 35 chu goal a chhuah lo a. A hmaa Oliver Kahn (33) record siam lai chu a khum a ni.
76 - 2004-05 season atanga mumal taka an chhinchhiah hnuah Neuer chu goalkeeper zingah Bundesliga game 20 khelha passing nei tha ber niin, 76% chu a pass hlawhtling a ni.
1 - Neuer hi a pianchamah vawi khat chiah a la inkhel a, 2010 kumah khan Bayer Leverkusen khelmualah 1-0 in an chak a, an goal a venghim a ni.
0 - A inkhelh hnem tawh ngaihtuahin Manuel Neuer hi vawi khat mah an la hnawtchhuak lo a ni.