09 Apr 2019 05:11

inkhel

Manny Pacquiao leh Rizin an inzawm

Manny Pacquiao chuan Floyd Mayweather Jr hnung a zui ve mek a, Japanese company Rizin chu contract a ziahpui.

Japanese company Rizin hi mixed martial arts lampang buaipuitu an ni a, anni hian nikum khan Floyd Mayweather Jr chu contract an ziahpui a, Tokyo khawpuiah Mayweather leh kickboxer Tenshin Nasukawa te chu an inhmachhawn a ni.

Boxing ring chhunga hneh loh nei lo Mayweather chuan Japanese kickboxer la naupang tak mai chu boxing ring-ah awlsam zetin a hneh a, first round-ah a chak nghal a. Hetiang deuh hian Manny Pacquiao pawhin Japanese kickboxer hi boxing ring chhungah a hmachhawn ve thut thei a, tun hnaiah Tenshin Nasukawa chuan Rizin hi contract thar a ziahpui ve leh chiah bawk a ni.

Rizin chief executive officer Nobuyuki Sakakibara chuan Thawhtanni khan Twitter-ah kum 40-a upa boxer Pacman nen thuthlung an ziah thu hi a tarlang a, an thlalak te pawh a dah tel a ni.

Nobuyuki Sakakibara chuan, “Tunah chuan Philippines-ah ka awm mek a, RIZIN 15 chuan Pacman hi kan chhawp chhuak vat dawn a, Japan rama ka kir leh hunah thu chiang kan puang vat ang,” a ti.

April 21 hian Rizin chuan thil tih tur an nei a, hetah hian Pacquiao chu a tel dawn leh dawn loh an la sawi rih lo a. Pacman hian boxing ring a luhchilh hnuhnun ber chu kumin January thla khan a ni a, American boxer Adrien Broner chu unanimous decision in a hneh a ni.

2015 khan Floyd Mayweather Jr chuan Manny Pacquiao hi a hneh a, hemi hnu hian boxing a chawlhsan zui a. Mahse, nikum kum hlui thlah zan khan boxing ring a luhchilh leh zuai a, hetah hian Nasukawa chu a hneh a ni.

Rizin 15 hmabak ruahman lawkah chuan Kyoji Horiguchi chuan Bantamweight Championship title a kawl mek chu UFC veteran Ben Nguyen lakah humhim a tum dawn a, tuna Pacman nen thuthlung an ziah takah chuan Nasukawa nen an inhmachhawn hi a rinawm ta hle a ni.