Manny Pacquiao chuan inhnek a la bansan dawn lo chiang hle a, kumin July 20 hian Keith Thurman nen an inhnek dawn.
Kum 40-a upa Manny Pacquiao hi January thla khan Adrien Broner nen an inhnek a, unanimous decision hmangin a chak a, WBA welterweight title chu a kawl zel a. Chawlh dawn hnai anga an sawi laiin P4P star Keith Thurman nen an inhnek tur thu hi an puang ve leh a ni.
Filipino boxer Pacquiao leh amah aia kum 10 zeta naupang Thurman te hian WBA super welterweight title an inchuh dawn a. Pacman hian 2015-a a hneh tak loh Floyd Mayweather nen inhnek leh a duh thu a sawi nasa viau a, mahse hei hi chu a takah a thleng thei dawn ta lo a, WBA title pahnih kawl theihna hun a nei thei dawn a ni.
A hun laia vawi 71 a inhnekna tur chungchang hi Instagram lamah Pacman chuan a tar chhuak a, “Kumin nipui chu boruak a lum belh ngei dawn e,” tiin Thurman nen an thlalak a dah tel bawk a ni.
Keith Thurman hi kum hnih chhung a reh hnuah a rawn invawrh chho leh a, kumin kum tirah khan unanimous decision hmangin Josesito Lopez a hneh a, bout 29-ah vawi 29 a chak thei a ni.
Josesito Lopez a hneh hnu hian American boxer chuan world champion hlui Pacman hmachhawn hi a remti a. Tun tumah hian a chak zawk a nih chuan WBA title a kawl lai chu vawi ruk a humhim thei dawn a ni.
Thurman chuan, “Manny Pacquiao hi kum tam tak hmuh tur a awm tawh dawn lo a, rei a inhnek a rinawm tawh lo a. Ani ang boxer ropui tak ka hmachhawn thei tur hi a phurawm ka ti a, hetiang hun tha ka nei hi ka lawm hle a ni,” a ti.
“Tun tuma kan inhnek boruakin a zir a nih chuan kumin kum tawp lamah emaw boxer lar dang hmachhawn leh theih ka inbeisei dawn a. Pacquiao hi tun hmaa boxer naupang deuh zawk, tha em em thin kha a ni tawh chiah lo a. A hma ang chu ni tawh lem lo mahse a la tha em em tho a, world class boxer a nihna hi a la bo chuang lo a. Boxing ngainatute tan chuan ennawm tha tak a nih theih ngei ka beisei,” a ti bawk.
Kumin January thlaa Broner a hneh khan Pacman chuan 61-7-2 record a nei thei chiah a, vawi 61 a chak tawhah hian vawi 39 chu a khingpuite a knockout a ni.
Pacman chuan kumin kum tir lamah khan, “Kum hi chu number ve mai a ni a, a pawimawh ber chu kan inpuahchah dan te, kan thawhrimna te hi a ni,” tiin a sawi.
Pacquiao leh Thurman te inhnek hun tur hi hriat ni tawh mahse, an inhnekna hmun tur erawh sawi chian a la ni chiah lo a. Mahse, an sawi thawi danah chuan MGM Grand chu an inhnekna hmun ni tura rin ber a ni.