MGM Grand Garden Arena, Las Vegas-ah Manny Pacquiao leh Adrien Broner-te inhnek chu neih zawh a ni ta a, champion lai Manny Pacquiao-a chuan round 12 an inbeih chhungin a chungnung zawk zia a lantir a, unanimous decision-in a chak a, WBA Welterweight Champion a ni chhunzawm bawk.

Kum 2016 kha Pacman-a tan USA-a khelh tawp ber a ni a, kum 3 hnua a inhnek lehah pawh a thatzia a lantir a, kum 40 na hmang mek Pacquiao-a hian tunlai boxer tha tiha sawi Broner-a lakah hian a kuttum rang zawk anih zia a lantir. An intum chhung hian Broner-a hian counter punch a tum viau nanga, Pacquiao lakah erawh a duh angin a che theilo a ni ber. Pacman-a hian Broner-a tan hun remchang a siam duhlo hle a, Broner-a hian hnek fuh ve thin mahse; Pacman a kutthlak rang tak erawh chhanna tha tawk a pe theilo thung.

Fight zawhah Pacman-a chuan, "Tuna ka duh ber chu Floyd Mayweather hmachhawn leh a ni. Mayweather-a nen hian kan intum leh ngei ngei a ngai, " a ti. Hetih lai hian Mayweather-a hi ring atanga hla vak lovah a awm reng a, engmah a sawilo thung.

Broner-a chuan fight zawhah Pacquiao chungchang sawiin, " Ka chak zawk chiang a ni. Min hnek nasa ngei mai, mahse min hnek fuhlo nasa em thung si. Ka hneh tih hi tupawhin an hria ang. Kan inhnek chhung zawng khan ka thunun zawk, " a ti. Statistics atang erawh chuan chiang takin Manny Pacquiao-a'n a hnek fuh hnem zawk. An inhnekna atang hian Pacquiao-a hian US Dollar 10 million a hlawh dawn a, Broner erawhin 2.5 million a hlawh thung ang.