04 May 2019 04:56

inkhel

Manny Pacquiao aiin ka tha zawk: Amir Khan

Amir Khan chuan Manny Pacquiao aia a that zawk thu sawiin, a hmelma kumhlun Kell Brook nen chuan an inhnek vat dawn niin a sawi.

A inhnek hnuhnun berah Amir Khan hian Terence Crawford a hmachhawn a, Crawford chu chakin WBO welterweight world title a la zui a. He inhnekah hian round 6-naah Terence Crawford chuan Amir Khan chu a kawng hnuai lamah a hnek a, Khan hian a inhnek chhunzawm thei lo nia sawiin, a khingpui chu a chak theih phah a ni.

Terence Crawford nen an inhnek tum hian Amir Khan chu a che tha lo zawk hrim hrim a, mi tam tak chuan Khan chu chak inbeisei lo hrim hrim anga an ngaih thu an sawi phah hial a ni.

A chak loh hnuah Amir Khan chuan, “Chawlh chungchang hi ka rilruah a la awm lem lo a, inhnek chawlhsan chungchang hi chu ka thinlungah a la tla na vak lo a ni,” a ti.

“Terence Crawford nen kan inhnek khan ka khingpui kha a tha khawp mai a, fighter tha tak a nih zia a lantir a, va hnek fuh kha a harsa hle reng a. Mi dang ka hmachhawn leh hunah chuan khatiang kha ka ni tawh bik lo ang a, ka che tha ve tawh khawp ang,” a ti bawk.

A sawi zelnaah boxer lar tam tak ai chuan a la that zawk thu sawiin, welterweight huang chhungah phei chuan lar deuh deuh tam viau mahse anni aia boxer tha zawk a nih thu a sawi chhuak a ni.

Khan chuan, “Dik taka sawi chuan boxer tha tak taka an sawi Manny Pacquiao, Danny Garcia, Lamont Peterson, Keith Thurman tih vel ai hi chuan ka tha zawk daih niin ka hria a. Mahse, anni zinga tu emaw ber nen hian inhnek ngat ila chuan mi ngaihven chu kan la hlawh khawp ang,” a ti.

“Tunlaia hming langsar tak Kell Brook te an la awm a, boxer rothap tak tak an la awm fur hlawm a. Kei hi ka vannei hlein ka hria a, inti thiam deuh deuh hi ka hneh thei phian zel a. Mi lar ve deuh hmachhawn theih hi thil harsa tak mai a ni a, mahse chutiang ti thei tur chuan dinhmun tha deuhah ka ding niin ka hria a. A tak ram a thleng thei a nih ngat chuan pawisa tam tak a lut thei dawn a ni,” a ti bawk.

Amir Khan chuan, “Kell Brook hi ka la hmachhawn chak reng a, ka rilruah a reh thei reng reng lo a. Mi chuan chak zawk tur sawi theih loh an ti a, kei erawh chuan Kell Brook hi round 6-ah emaw, round 7-ah emaw ka knockout thei ngeiin ka ring,” a ti.