Tottenham chuan Champions League quarter-final ah Manchester City paltlangin semi-final an luta, Spurs manager Mauricio Pochettino chuan a la awih thei lo niin a langa, mang rama an la chen reng thu a sawi.

Pochettino chuan, “Semi final kan thleng thei hi kan lawm em em a, mang ramah kan la cheng a kan la harh chhuak lo a ni ber. Kan supporter te hlim zia kan hria a, keini pawh kan chhungte nen kan lawm hle. Inrinni inkhel tur atan kan inbuatsaih mek avangin kan rilru kan in lak pen tir loh a ngai a ni.

“Mang rama kan la cheng hi a thatna chen a awm a, Inrinni-a kan inkhelh tur atan rilru zawng zawng kan pe thei. Kan hlim em em a, kan za vaia tan a hlu em em bawk. Kan inchhuang a, mahse season tawp hma chu tih tur kan la ngah hle a ni,” a ti.

Semi final-ah Tottenham hian Real Madrid leh Juventus pawh lo pet tla tawh tu Ajax an hmachhawn dawn a, Tottenham Hotspur Stadium-ah first leg an khel hmasa ang.

Sawi zelin Pochettino chuan, “Kan inngaihtlawm a ngai a, tumahin City kha kan hneh an ring lo. Inrintawkna nasa tak min pe a, mahse chu chu kan hman thiam loh chuan hnehna kan chan kha a dawt lehah kan chak loh phah thei.

“Ajax hi zah taka kan khelhpui an ngai dawn a, Real Madrid leh Juventus an pet tlak tawh avangin rinkai zawk an ni tihna a ni. Kan tum tur lam hi a pawimawh ber lova, a pawimawh zawk chu semi-final kan khelh dan tur a ni a, kan squad hi dam kim ngei ila ka ti hle a ni,” a ti bawk.

Naktuk (20/4/19) tlai dar nga hian Tottenham chuan Premier League inkhelah Champions League quarter final-a an hneh zawh chiah Manchester City tho chu Etihad Stadium-ah an luhkhung lehnghal dawn a, inkhel hmuhnawm tak a beisei chi viau ang.

Tottenham hi season tharah Champions League an khel duh a nih chuan chak loh a thiang tawh lo tluk a ni a, City tan hian he inkhel hi pawimawh leh zualin, an chak lo a nih chuan Liverpool an champion zui mai a rinawm tawh bawk a ni.