Diogo Dalot chuan Manchester United tan Europa League chu a lian tawk lo nia sawiin, an club chuan Europa League title erawh an lak ngei a ngaih thu a sawi.

Manchester United chu season liam taah khan Premier League-ah parukna an ni thei chauh a, heti a nih avang hian tun season-ah UEFA Champions League an khel pha ta lo a, Europa League lamah an inlan leh a ngaih phah a ni.

Tun tum chauh hi tun hnaiah Champions League khel pha loa an awm a ni bik lo a, a hma pawhin Europa League hi an lo khel tawh a, 2017 kumah khan Jose Mourinho kaihhruaina hnuaiah Europea League champion an lo ni tawh a ni.

Dalot chuan, “Europa League hi inelna lian tham tak mai a ni a, he club tan hi chuan a lian tawk lo thung a. Kan club hi chu UEFA Champions League khel reng tur kan ni a, kum tin Europe khawmualpuia inelna sang berah hian tel ziah tur kan ni a, champion fo tur pawh kan ni,” a ti.

“Inelna lian tak mai a ni a, eng team pawh champion ta se hlawhtlinna duhawm tak a ni dawn hrim hrim a. He club tan hian lian tawk lo mah se kan tel ve tho si avangin kan champion ngei a ngai dawn a ni,” a ti bawk.

Tun kar Nilaithawhtanah hian Manchester United chuan Old Trafford-ah Astana an lo mikhual dawn a, Europe khawmualpui inelna chu an khel tan dawn a. Hemi hnuah hian Group L match-ah Partizan leh AZ Alkmaar te pawh an la hmachhawn zui dawn a ni.

Portuguese defender chuan, “Ka sawi tawh ang khan Europa League hi kan club ang hian a lian hran lo a, heti chung hian he inelnaah hian kan tel ve miau avangin kan champion theih ngei a pawimawh hle a ni,” a ti.