Media tena khawvel ralmuanna tichhetu nia an puh North Korea hotupa Kim Jong-un hi fooball ngaina tak a ni a, English Premier League chu a league en ngun ber a nih thu The Sun chuan a tarlang.

Ram tereuhte leh UNO te pawhina an hrek deuh reng pawh ni mahse ram hlauhawm tak din thei khawpa mi ropui Kim Jong-un hian Nuclear bomb a nei ran tawh, bomb keng thei tur missiles pawh a enchhin chho mek zel a, America ram an kah phak thu a sawi chhe chhe mai.

North Korea hi media ten sawichhe viau thin mahse India hian tluk lohna tam tak a nei a, India ram hi mahnia commercial jet pawh siam hleithei lo a nih laiin North Korea chuan ram dang puihna tel lovin commercial jet mai bakah indo thlawhna an siam thei tlat mai.

Khawvel tana mi tihbaiawm nia media ten an sawi thin Kim Jong-un hi Manchester United fan ruh tak a nih thu Italian senator Antonio Razzi chuan a sawi. A lal lai ngei hian English Premier League-ah North Korean player pakhat tal an khel tur a ni tiin a sawi nghe nghe niin Antonio Razzi chuan The Sun a hrilh.

Kim chu Manchester United player zingah tunge a inchan ber? Eric Cantona nge Zlatan Ibrahimovic? Tia an zawhna chu Kim chuan, "Tumah, Kim chu Kim a ni mai, mi dang an awm thei lo," tiin a chhang nghe nghe a ni.

Kim hi football fan ruh tak a ni a, Antonio Razzi nen hian an inkawmngeih hle nia sawi a ni bawk. Tin, Razzi khua Italy-ah inkhel a en ngun hle nghe nghe nia sawi a ni a, Switzerland-a lehkha a zir laiin San Siro Stadium-ah inkhel a en ngun hle nia sawi a ni.

North Korean wonderkid Han Jwang-song chu Europe club liana khel thei tura rin a ni a, player naupang talent nei tha tak niin Italian second tier club Perugia tan tunah hian a khel mek a ni.