Khawvela football club ropui berte zinga mi Manchester United chuan sulhnu duhawm tak tak an nei hnem tawh hle a, player tha deuh deuh an nei chho teuh tawh bawk a ni.
Position hrang hrangah Manchester United chuan khawvela player tha ber berte zinga sawi tel an lo nei fo tawh thin a, tun thleng hian player lar tam takin Old Trafford lama luh theih an la chak nghe nghe a ni.
Tlar hma lamah pawh Manchester United hian player fakawm tak tak an lo nei ve teuh tawh a, striker an neih tawh zinga ropui zual mi panga han thlang chhuak ila.
5. Ruud van Nistelrooy
A hun laia khawvela striker tha berte zinga mi Ruud van Nistelrooy khan goal thun a harsat lo thei thin hle a. Netherlands striker khan PSV Eindhoven tan inelna hrang hrangah goal 77 a thun a, sulhnu a nei tha bawk a, Manchester United chuan 2001 kumah khan £25.5 million in an lei a ni.
Ruud van Nistelrooy chu Old Trafford lama a insawn hnuah a che tha nghal hle a, Manchester United tana a game hmasa berah Liverpool nen Charity Shield an inchuh a, hetah hian goal a thun nghal a ni.
Van Nistelrooy chuan season nga chhungin Manchester United tan game 219 a khel hman a, hengah hian goal 150 zet a thun hman a. Premier League title vawi khat a la a, 2002-03 season-ah khan Premier League Golden Boot a dawng nghe nghe a ni.
4. Andy Cole
Andy Cole kha Premier League huanga goal thun hnem lama pathumna a ni a, hei hian eng ang taka player tha nge a nih tih chu a ti chiang hle.
Arsenal academy atanga chawr chhuak Andy Cole hian Newcastle United ah hming a chher fuh chho hle a. England striker hian Magpies tan inelna hrang hrangah game 84 khelin goal 68 ngawt mai a thun thei a. Manchester United chuan 1995 kumah khan a hun laia British record siamin £7 million zetin an lei a ni.
Cole chu tlar hma lamah Dwight Yorke nen an inkawp fuh thei hle a, Old Trafford lama a insawn hnuah game 275 khelin hengah hian goal 121 chu a thun thei a. 1999 kumah khan Manchester United chu trophy pathum a lakpui a ni.
3. Denis Law
A vanglaiin Denis Law chu Manchester United leh Manchester City player a ni ve ve hman a, United tana a khelh lai hian a hming chuan sawi a hlawh zawk daih a ni.
Manchester United tana goal thun hnem lama pathumna ni thei Denis Law hian 1962 kumah khan Torino atangin Red Devils a zawm a, a hmain Manchester City player a lo ni ve tawh a, hei vang hian English league lamah chuan a mikhual lo hle.
Scotland striker hian Manchester United tan game 404 khelin hengah hian goal 237 lai a thun hman a. 1964 kumah khan Ballon d’Or a dawng a, Manchester United chu Football League First Division title vawi hnih a lakpui hman a ni.
2. Wayne Rooney
Manchester United tana goal thun hnem ber Wayne Rooney chu 2004 khan Everton atangin £33.3 million in an lei a. A hun lai khan hriat a la hlawh lo hle a, chuti chunga pawisa tam tak senga lak luh a nih avangin mi tam tak chuan mak pawh an ti hle.
Wayne Rooney chuan Manchester United tana a game hmasa berah UEFA Champions League lamah Fenerbahce lakah hattrick a siam nghal a, eng anga player tha nge a nih tih chu a lantir nghal a. Old Trafford lama a insuan hnuah hian inelna hrang hrangah game 559 a khel hman a, hengah hian goal 253 zet a thun hman a ni.
1. Eric Cantona
‘King Eric’ an tih hial hi Sir Alex Ferguson chuan 1992 kumah khan Leeds United atangin a la lut a, a ti fuh hle a, an club player neih tawh zingah chuan an dah san ber a la ni.
Khelmual chhung leh pawnah pawh Eric Cantona hian kawng tam takin Manchester United chu a tha zawngin a hruai nasa hle a. France forward hian inelna hrang hrangah Manchester United tan game 185 khelin hengah hian goal 82 a thun hman a, Premier League title pawh vawi li a lakpui hman a ni.