Manchester United chuan Crystal Palace atangin Aaron Wan-Bissaka chu an la lut dawn hnai ta a, £50 million a inlei turin an inbe fel tawh niin an sawi.

Aaron Wan-Bissaka hian medical test te a paltlang phawt a ngai a, hemi hnuah hian hun rei tak daih tur contract a ziak thei dawn a. Contract hi a ziak ta a nih chuan tuna a hlawh let riat vel chu a hlawh thei tawh dawn niin an sawi a ni.

Kum 21-a upa Wan-Bissaka hian Crystal Palace-ah kar khatah £10,000 a hlawh mek a, Manchester United a zawm a nih chuan Old Trafford-ah kar tin £80,000 a hlawh thei tawh ang.

United chuan Wan-Bissaka man hi an pe tla nghal vek dawn lo a, a tirah Palace chu £45 million an pe phawt ang a, a hnu lamah £5 million chu an pek belh leh dawn a ni.

Season thar atan Manchester United chu an inpuahchah chho zel a, player pawh siksawi nual an la tum a, hmachhawp eng eng emaw chu an la nei nual a. Pawisa hman tur an la nei bawk a, player lak belh tura an hual chu an bawhzui tan mek a ni.

A hmain Manchester United hian Swansea atangin Daniel James chu an lo lei tawh bawk a, Aaron Wan-Bissaka hi an player lei pahnihna a ni thei dawn a. An inlei fel hunah chuan English right-back Wan-Bissaka hi an club player man to lama palina a ni dawn a. Paul Pogba (£89 million), Romelu Lukaku (£75 million) leh Angel Di Maria (£59 million) te chu a chungah an awm ang a, a hnuai chiahah Fred (£47 million) chu a awm dawn bawk a ni.

Ole Gunnar Solskjaer chuan Old Trafford-ah tlema player naupang deuh zawk lak hnem a tum hle a, United squad siamthat hna chu ngawrh taka thawh a tum hle a. Season hman zawh takah parukna chauh an nih theih avangin squad siksawi vak a, season tharah chuan a chungnung pali zinga tel theih ngei a tum hle.

England Under-21 Wan-Bissaka hian February 2018 ah khan senior team tan a khel tan a, tun season-ah khan a chet that em avangin Crystal Palace tantute chuan Player of the Year atan an thlang zui a ni.