Antoine Griezmann chuan Barcelona a pan hma khan Manchester United pan thei dinhmuna a din ve thu sawiin, tlar hmaah chuan Alexandre Lacazette chu kawppui a chak ber thu a sawi.

France striker Antoine Griezmann chuan Atletico Madrid chhuahsanin €120 million (£107 million/$134 million) zetin Camp Nou lam a pan fel tawh a. Hun rei tak an lo sawi zawm tawh niin, tunah chuan thawm ri reng kha a takin a thleng ta a ni.

Griezmann chuan Barcelona nen an sawi zawm hma tawhin Old Trafford lam pan thei dinhmunah a ding hman niin a sawi chhuak a. England lam pan chu a duh hman tep a, mahse Spain rama inkhelh a thlang leh ta zawk niin a sawi a ni.

“La Liga hi nuam ka ti em em a, hmun dang pan pawh hi ka hreh phah a. Premier League lama thil awm tha lo tak mai pakhat a awm a, ni sa hi a ni,” tiin Griezmann chuan a sawi.

“Thawk khat lai khan ka tan Manchester United zawm theihna hun tha tak mai a inhawng a, thu ka pawt chat hman lek lek a. Mahse, a tawpah chuan ka khelhna hmun sawn loh kha ka duh leh ta zawk a ni,” a ti.

Catalunya a pan takah chuan Antoine Griezmann chuan tlar hma lamah vawi nga ngawt Ballon d’Or lo dawng tawh Lionel Messi chu a kawp chho dawn a. Lionel Messi chu khawvela player tha ber a nih thu a sawi rualin, tlar hmaa khelhpui a chak ber chu ram tana a khelhpui thin Alexandre Lacazette a nih thu a sawi thung.

World Cup winner Antoine Griezmann chuan, “Alexandre Lacazette nena tlar hmaa tlan dun hi ka chak khawp mai a. Amah hi ka thianpa a ni a, ram tan kan khel dun thin a. Player tha zet mai a ni a, a thiamna hi a theuneu lo hle,” a ti.