Robin van Persie chuan Emirates Stadium chhuahsana Old Trafford lama a luh avanga Arsenal tantute an lo thinrim a nih chuan ngaihdam a dil tih sawiin, Manchester United a zawm ta kha tun thlenga a la inchhir loh thu a sawi.
London khawpuia kum riat zet a awm hnuin Dutch striker Van Persie chuan 2012 khan Arsenal hmelma club Manchester United a zawm a. Arsenal tan game 278 khel hmanin, hengah hian goal 132 zet chu a thun a. Arsenal chu FA Cup pakhat chiah a lakpui thei a, trophy tam zawk la thei turin Manchester United a zawm ta daih a ni.
Manchester United a zawm tan tirh season-ah trophy a la thei nghal a, Red Devils chu Premier League champion an ni a. Tun hnuah hun chu her let leh theih niin, duh thlang tha leh tur pawh ni se a hma ang bawkin Arsenal chhuahsanin Manchester United chu a zawm leh tur thu a sawi chhuak.
Van Persie chuan, “Arsenal chhuahsan a Manchester United ka zawm khan ka kalsan takte kha ka lakah an thinrim em em a ni tih ka hria a. Kha tih lai khan captain ka ni a, top scorer ka ni bawk a, khami kumah khan pathumna kan ni bawk a. Mahse, tu pawhin chona thar kan duh a, zinkawng thar zawh te kan chak thin a, kei pawhin bung thar kai tumin Old Trafford kha ka pan ta a ni,” a ti.
“Mi rilru ka lo tina a nih chuan ngaihdam ka dil a. Mahse, kha kha ka nih dan dik tak, keima mize nghet a ni a. Thutlukna ka siam a, ka thutlukna siamah chuan ka ding nghet tlat bawk a. Khatiang thutlukna ka siam avang khan Arsenal chu ka hmu khawlo emaw, ka hmu hniam emaw a ni chuang lo,” a ti bawk.
A sawi zelnaah, “Arsenal Football Club chungchangah hian tawngkam duhawm lo pakhat pawh sawi chhuak thei ka ni lo a, ka sawi chhuak duh bawk hek lo a. Arsenal-ah khan mipa naupang ang velin ka lut a, puitling, player thang tha tak angin ka chhuak leh a ni,” a ti.
“Arsenal kaihhnawih mi leh sa lakah rilru dik lo ka pu miah lo a, an chungah ka lawm em em zawk a. Kha leh chen min enkawl a, hun tha tak mai min pe a, an zarah mi hriat te ka hlawh chhoh phah a. Ka tihsualah min siam tha a, kawng dik min kawhhmuh nasa hle a. Atthlak takin red card ka hmu hman nual a, khati chung khan Arsene Wenger chuan min la khelhtir zel tho a. Club chhunga chhungkaw boruak duhawm tak mai ka chhim thei kha lawmawm ka ti reng a ni,” tiin Persie chuan a sawi.
Dutch striker chuan, “Ka chhuah dawn thleng khan Arsene Wenger nen kan inhnial miah lo a, inhmuh thiamloh pawh kan nei hran lo a. A chang kha chuan ngaihdan inmil loh zeuh zeuh chu kan nei a, mahse boruak duhawm lo erawh a thleng ngai lo thung,” a ti.