Manchester United chuan Borussia Dortmund atanga Jadon Sancho lak ngei an tum a, a man hi vawi thum vela pe tla thei turin dil an tum.

Borussia Dortmund chuan English winger Jadon Sancho chu €120 million (£108 million) an chhiar a, a man an chhiar hi tihhniam an tum lo hle a. Manchester United chuan lak luh ngei an duh avangin kawng an dap mek a, pawisa hi vawi khata pe tla vek loa lei dil an tum niin an sawi.

Bundesliga club chuan vawi khata pawisa hi an hmu nghal vek dawn a nih loh pawhin a tirah €100 million (£90 million) tal chu hmuh an beisei niin an sawi a, an pawisa dawn hmang hian kum 20-a upa Sancho thlaktu tur ngaihtuah ve an duh a ni.

Dortmund hian August 2017 a Ousmane Dembele an hralh dawn pawh khan tuna ruahmanna an siam ang deuh hi an lo kalpui tawh a. Dembele manah khan a tirah €140 million an phut a, a hnuah erawh €105 million in an lungawi a, a hnuah erawh tlem chu an inpek belh leh a ni.

Jadon Sancho hian tun season chhungin Bundesliga game 32 a khel a, hengah hian goal 17 a thun bakah mi goal thun tur vawi 17 ngawt mai a siamsak a. Manchester United hian Sancho hi an lei thei ta lo a nih chuan Bayern Munich winger Kingsley Coman chu loan-a lak an rilruk niin thu thang a awm a ni.

German football journalist Raphael Honigstein chuan Jadon Sancho hi Manchester United in an la lut thei a nih ngat chuan an tangkaipui viau a rin thu a sawi a. Season tharah pawh a hma aia an hlauhawm zual phah a rin thu a sawi bawk a ni.