Manchester United chuan player an lakna man an la ba teuh mai a, tun dinhmunah chuan transfer leiba hi £100 million chuang zet an la nei niin an sawi.

Tun hnai khan United chuan an club sum dinhmun thar ber an puangzar a, heta a lan dan chuan nikum June thla tawp thlenga an club in player lakna atana sum an la pek tlak loh chu £258 million zet niin, hei hi eng emaw zat chu an pe tla tawh a ni.

United hian Juventus atangin Paul Pogba chu £89 million zetin an lei a, mahse pawisa hi an pe nghal vek lo a, kum nga chhunga pek tlak atan inremna an ziak vek a. Tun hnai season li chhungin Manchester United hian transfer atan ringawt £560 million zet mai an hmang a, player hralh chhuahna atangin £196 million chu an hmu let tawh a ni.

Season liam ta tawpah khan United hian leiba an ngah hle a, mahse tunah chuan tlem tlemin an inrul chho ve zel a, an dinhmun pawh a zia ve leh hret hret tawh a. An sum dinhmun thar berah hian an leiba pawh a hmaa £258 million zet tling kha £129 million chauh a ni tawh a. Nikum September thla khan club dangte chuan United sum hi £26 million an batsak ve thung a, heti a nih chuan hei hi an hmuh hunah an leiba chu £103 million ah a tla thei dawn a ni.

September thla khan United sum lak luh hi £135 million vel zet a tling a, kum chanve vel a ral leh hunah phei chuan hei ai hian an lak luh hnem an beisei zui a. Hetianga an sum dinhmun a ziaawm chhoh zel chuan Ole Gunnar Solskjaer pawh player thar leina tura a neih sa hralh turin an tih loh a rinawm a ni.

Club te hian player leina tur an nei remchang lo a nih chuan bank atangin pawisa an puk fo a, Manchester United leh Manchester City te pawh hian Santander bank atangin an puk mek bawk a ni.