Manchester United chuan an midfielder Paul Pogba leh Paris Saint-Germain forward Neymar inthleng an duh lo niin tun hnaiah thu a thang.
Paul Pogba chu nipui transfer window inhawn chhung ngeiin Old Trafford chhuahsan tur anga ngaih a ni chho mek a. Engmah chiang la awm rih lo mahse amah ber hian hmun danga chona thar hmachhawn a duh thu a sawi a. Mi tam tak chuan a kalna tur an inrinsiak nasa hle.
Tun hnaia thawm a neih takah chuan Real Madrid leh Juventus te chuan an beng an chhi nasa hle a, French midfielder hi lak theih dan an ngaihtuah zui vat a. Hetiang deuh bawk hian Ligue 1 striker Neymar chuan Parc des Princes chhuahsan a duh thu a sawi ve mek bawk a, a club hlui Barcelona pan a chak ber niin an sawi.
The Independent chanchinbuin an tarlan danin Paris Saint-Germain chuan Manchester United chu dawrin, an player pahnih chhuah duhte chu inthleng mai an rawt niin an tarlang a. PSG rawtna hi United chuan an lo pawm ta lo niin an tarlang a, player inthleng ngawr ngawr chu an duh loh vang ni loin, Brazilian forward hlawh atana sum sen a tam dawn em avanga duh lo niin an tarlang.
United executive vice-chairman Ed Woodward chuan 2016 khan Paul Pogba chu an club-ah a ko kir leh a. Tun hnaiah Manchester City leh Liverpool te chu an um pha lo tan hle a, hei vang hian huang khata an awm leh theih nan player langsar deuh hlek a melh leh tan a ni.
Ed Woodward hian Old Trafford-ah player lian tham deuh lak luh dan ngaihtuah mahse Neymar chu sirah a hnawl thung a. Brazilian star hian kar khatah £900,000 vel zet a hlawh mek a, hetiang zat player pakhat hlawh atana phawrh chu an inhuam loh avanga hnawl niin an sawi.
Old Trafford-a player awm mek zingah Alexis Sanchez chu hlawh sang ber a ni a, kar khatah £500,000 vel bawr a hlawh mek a, hei pawh hi tihhniam dan an ngaihtuah mek lai niin, Sanchez-a hlawh let vel pek ngai player lak chu an duh a rinawm lo hle.
Brazilian striker Neymar hian tun hnaiah Barcelona lama let leh theih a duh thu a sawi chhuak a, a kir leh theihna tur a nih phawt chuan Barca tantute hmaah ualau taka ngaihdam dil a inhuam thu pawh a sawi tawh nghe nghe a ni.
Nipui transfer window inhawn chhung ngeiin Neymar hian Paris Saint-Germain hi chhuahsan theih a inbeisei hle a, kum hnih kaltaa world record thar siama £198 million zeta a chhuahsan Camp Nou lama luh leh tluka duh a neih loh thu a sawi a ni.