Manchester United chuan season thar atan insiamthat viau an tum hle a, hetiang tur hian Lorenzo Insigne chu Napoli atangin £86 million vela lei an tum niin an sawi.

Ole Gunnar Solskjaer chuan nipui transfer window inhawn hunah player awm sa eng emaw zat hralh chhuah a tum a, player lei thar nual a tum bawk a, season tharah chuan title beisei theih a tum hle a. Tunah tak chuan Napoli winger Lorenzo Insigne chu Solskjaer hian a thlithlai tan niin an sawi a. Paris Saint-Germain pawhin Insigne hi lak dan an ngaihtuah ve mek niin an sawi bawk.

Italy rama chanchinbu thenkhatah Napoli president Aurelio De Laurentiis chuan Insigne agent Mino Raiola chu tun hnaiah man to deuh hleka hralh dan ngaihtuah turin a hrilh niin an tarlang a. De Laurentiis hian Insigne chu club dang hnena to deuha hralh chhuah a, an hralhna chu an squad thawm thatna atan hman a duh niin an tarlang.

Italian winger Insigne hian tun hnaiah khan hmun dang pan chungchang a sawi ri a, nipui transfer window inhawn hunah Liverpool leh Chelsea tih vel zawm theih chu thil pawi tak a nih loh tur thu a sawi a. Heng club te hian an thlem a nih vaih chuan thlem a awlsam viau a rin thu a sawi a ni.

Ram tana vawi 30 khel tawh Insigne chuan, “Kuminah hian kum 28 ka ni a, eng club emaw hian hnial rual loh contract min rawn sihhmuh ve thut thei a. Chutiang hun chu thleng ta se, ka hnial na vakin ka ring lo,” a ti.

“Ka hlutna hi ka lantir chiang tawhin ka hria a, tu tu emaw hi chuan min ngaisang ve hle pawhin ka hria a. Tun dinhmunah chuan hetiang lampang hi ka la ngaihtuah vak rih lo a; mahse, min duhtu hi chu khawi khawiah emaw hi chuan an awm ve chiang a ni,” a ti bawk.

A sawi zelnaah, “Mi ngaihhlut hlawh ve viau mah ila, tunah tak hi chuan min beiseitu club emaw, min lei duh nia sawi deuh te hi an awm rih lo a. Napoli-ah hian kum heti zat hi ka lo awm ve ta a, ka tih tur chu tha takin ka hlen chhuak zel niin ka hria a, eng ang nge ka tih theih tih pawh hi mi mithmuhah ka pho chhuak ve ngei chuan ka hria,” a ti.

Insigne chuan, “Mi tam tak chuan hmun dang pan ka tum avanga Mino Raiola hi ruai niin min ngai a, chutiang chu a ni hauh si lo a. An duh dan danin lo ngai vel se a pawi ka ti chuang lo a. Raiola ka rawih chhan chu Jorge Mendes ang bawka a tha berte zinga mi nia ka hriat vang a ni,” a ti.

“Napoli-a ka awm chhung hi chuan 110% in ka tang zel dawn a, helai hmunah hian hun rei zawk awm theih hi ka duhthusam a ni,” a ti bawk.