Manchester United chuan Germany lama che tha chho tak mai, Jadon Sancho chu an hmutai hle a, England rama lak let leh dan an ngaihtuah mek niin an sawi.

Jadon Sancho chuan 2017 khan Manchester City chhuahsanin Bundesliga club Borussia Dortmund chu £8 million velin a zawm a, Germany a pan hnuah a che tha chho hle a, tun season ah pawh Bundesliga-ah chuan player langsar ber pawl a ni chho mek a ni.

Kum 18-a upa Jadon Sancho hi Nilai zan khan England a chhuahsan hnua a vawi khatna atan anmahni ramah a kir leh a, Wembley Stadium ah Tottenham Hotspur nen an inkhel a, 0-3 in an tlawm a ni.

Ole Gunnar Solskjaer chuan player la naupang tak Sancho hi Old Trafford a seng luh a duh niin an sawi a, Norwegian boss hian Sancho chu man to deuh hlek pawha lak luh theih ngei a rilruk niin an sawi.

Borussia Dortmund chuan English star Sancho hi man tlawm taka hralh an tum lo hle a, Red Devils pawh hian an lei dawn a nih chuan a lo berah £70 million vel tal chu an theh chhuah a ngaih hmel hle a. United hian an lei a nih chuan Manchester City chuan Sancho man atang hian 15% chu an hui ve thei dawn a ni.

Sancho hian Manchester City academy-ah kum hnih chhung hun a hmang a, mahse first team lamah khelhna hmun a chan theih loh avangin hmun dangah a mit a len a, Borussia Dortmund hi a zawm zui a ni.

Pep Guardiola chuan Sancho hi kawl chhunzawm theih a duh viau a, mahse first team-ah player a nei hrawl si a, Raheem Sterling, Leroy Sane, Riyad Mahrez leh Bernardo Silva te chu Sancho ai hian a la ring zawk a, hei vang hian Sancho chu a chelh thei ta lo a ni.

Tun season-ah Jadon Sancho hian Borussia Dortmund tan game 29 a khel tawh a, hengah hian goal 8 a thun tawh bakah mi goal thun tur vawi 13 chu a siamsak tawh bawk a ni.