Manchester United-in De Ligt an thlithlai ngun

01st April 2020, 09:04PM

Manchester United chuan Juventus defender Matthijs de Ligt an ngaihven hle a, Italy rama a dinhmun an thlithlai ngun hle.

Matthijs de Ligt chuan nikum nipui transfer window inhawn lai khan Ajax Amsterdam atangin Juventus chu €75 million in a zawm a. Turin khawpui pan tur hian amah beiseitu Manchester United, Paris Saint-Germain leh Barcelona te chu a hnawl a ni.

Netherlands centre-half De Ligt hi Ajax ah a che tha thei hle a, Dutch club lian hi 2018-19 Champions League semi final a thlenpui thei hial a. Hetiang taka a chet that avang hian Europe khawmualpuia rawlthar duhawm ber pawl tia sawi a nih theih phah a ni.

Juventus a pan hnuah De Ligt chu beisei angin a langsar thei meuh lo a, amah pawhin Italy ram a pan hnuah tha ve tak nia inngaihna a neih meuh tawh loh thu a sawi chhuak hial a ni.

Kum 20-a upa De Ligt hian khelhna hmun a chang nghet thei lo hle a, tunah phei chuan Merih Demiral chu bul tantuah an hmang tawh zawk a. Maurizio Sarri kaihhruaina hnuaiah inhliam an tam chhoh deuh hlek avangin bul a tan ve leh thei hram chauh a ni.

Manchester United chuan Matthijs de Ligt hi an la ngaihven reng a, tun hnaiah phei chuan an thlithlai ngun leh tawh hle niin an sawi a. Manager Ole Gunnar Solskjaer chuan nipui transfer window inhawn hunah lei theih a nih phawt chuan lei a duh niin an sawi.

United hian De Ligt bakah player ngaihven an nei nual a, Borussia Dortmund atanga Jadon Sancho lak an duh bakah Jack Grealish, James Maddison leh Jude Bellingham te pawh an ngaihven tel bawk a ni.

Copyright © inkhel.com 2024. All rights reserved.